Shillong, Rymphang 14: Ki ar tylli ki jingïalehkai ka lympung Shillong Cricket League kyrdan 3rd division kiba la long hynne ka sngi ki la jam sha kaba kut ha kaba ka kynhun Lawsohtun bad ka Metallica CC ki la khur jingjop.
Na ka liang jong ka Lawsohtun ka la lah ban pynliem da 6 wicket ïa ka Shillong Sixers ha ka jingïalehkai kaba nyngkong hynne ka sngi.
Ha ka jingïakhun, ïa ka toss la jop da ka Shillong Sixers bad ka jied ban tied nyngkong. Kane ka kynhun ka la tied thik tang 100 ron naba shah pynkhyllem baroh 10 ngut ha ka 18.5 over. U Shining u la ïarap da kaba tied 24 ron na ki 30 bol, katba u Meinam Amit Singh u la tied 20 ron naki 22 bol.
Haba phai pat sha ki rangkawangbol, u Hilar Thabah u la pyndep 4 over, shah tied tang 12 ron bad khur haduh 3 wicket, katba na ka liang jong u Cavin K Wanniang u la pyndep 4 over, shah tied 18 ron bad khur 3 wicket.
Haba jubab ïa ka thong ba la buh, ka Lawsohtun ka la tied pyndep tang hadien 15.4 over ban kamai 102 ron bad shah pynhap tang 4 ngut, kaba la pynlong ïa ka kynhun ban jop ïa ka jingïalehkai da 6 wicket.
Na ka liang jong Sumeet Gurung (3.4 over: shah tied 26 ron: khur 2 wicket) u la trei shitom hynrei marwei u khlem shym la lah ban pynhap ïa ki wicket ka liang pyrshah.
Napdeng ki rangtied, u Hilar Thabah u la kamai 15 ron na ki 25 bol, katba ka namtam ka long sha u Greatestful Lyngkhoi u ba la khyrwit 47 ron naki 39 bol (ryngkat bad 2 wicket ba u la khur ha ka bol) bad ban khur syndon ïa ka khusnam Player of the match.
Ha ka jingïakhun kaba ar, ka kynhun Metallica CC ka la jop da 7 wicket ha ka jingïakhun pyrshah ïa ka XI Stars CC.
Ka kynhun XI Stars CC ka la jied ban tied nyngkong hadien ba jop ïa ka toss, bad kane ka kynhun ka la lah ban tied 137 ron shuwa ba baroh 10 ngut kin shah pynkhyllem noh ha ka 19.4 over.
U Sunil Kumar u la kamai bun ron duh napdeng ki rangtied, da 47 ron naki 23 bol, katba u Jason Wahlang u la tied 18 ron naki 25 bol.
Napdeng ki rangkawangbol kiba la seisoh ha kane ka jingïakhun ki long u Vishal Das (4 over: shah tied 16 ron: khur 3 wicket), katba u Gurjit Singh (4 over: shah tied 30 ron: khur 3 wicket).
Ka Metallica CC ka la jubab da 140 ron shah pynhap tang 3 ngut tang ha ka 17.1 over ban khur ïa ka namjop.
Ka namtam ka long sha u Pradeep Purkaystya u ba la khyrwit haduh 92 ron naki 64 bol ban khur syndon ïa ka khusnam Player of the match.
