Jowai Jymmang, 06: Ka Meghalaya Commercial Truck Owner and Drivers Association (MCTODA) Jaiñtia Unit, ka la sdang ïa ka jingïakhih sangeh kamai (indefinite Strike) kaba la sdang naduh mynta ka sngi Baar ha 7 Mile Pasyih West Jaiñtia Hills District.
Baroh ki trai trok bad nongñiah trok hapoh ka lama jong ka (MCTODA) kiba la don 281 tylli ki truck napoh ka Ri-Lum Jaiñtia ki la wan ïashim bynta lang ha kane ka jingsangeh ïakhih, halor ka nongrim ban dawa pynkiew ïa ka bai kali bad ka rukom kit ïa ki mar ki mata na ki Coke Factory kiba don hapoh ka Ri-lum Jaiñtia.
U Bah Shanborlang Suchiang uba dei ruh u Secretary ka Unit haba kren sha ki lad pathai khubor ula ong kane ka jingïakhih kaba la sdang naduh mynta ka sngi, ka long halor ka jingdawa jong ki na ki cook factory ban pynkiew ïa ka dor bai kit kaba dei ban ïoh T. 2500 shi ton, hynrei kumba long mynta ki ïoh tang T. 1400 shi ton bad kaba ar ki la dep dawa ban ailad shwa ïa ki trai trok napoh ka jylla ban kit ïa u coke na kitei ki karkhana, hynrei kane ka jingdawa na ka por sha ka por ka la long pynban ka bym seisoh.
U Secretary ka Meghalaya Commercial Truck Owner and Drivers Association (MCTODA) Central Body Bah Peter Manar ula ong ka jingwan lang jong ki mynta ka sngi ka long kum ka dak ban ïasnohkti lang bad ban ai ka jingkyrshan pura ïa kane ka Association napoh ka Ri-Lum Jaiñtia. Shuh shuh ula ong ka jingpynlong ïa kane ka jingsangeh ïakhih ka long kum ka dak ban pynïoh ïoh ïa ka hok jong ki trai jylla.
Kiba bun ki Unit hapoh ka seng kiba don ha kylleng ki District kum ka West Khasi Hills bad South Khasi Hills haba don kum kine ki jingdawa, na ka liang ki Coke Factory kiba don ha kitei ki District ki kloi ban wan sha ka miej jingïakren ban pynbeit namar ka dei ka hok hi jong ki trai bad ki nongñiah kali ban dawa, la ong u Bah Manar.
