Shillong, Nailar 29: Ki Jingïaseng Samla bapher bapher kiba hap hapoh ka Khasi Jaiñtia Presbyterian Assemcly (KJPA) mynta ka sngi, ki la sdang ïa ka jingrakhe ïa ka Youth Week lane ka taïew ba kyrpang jong ki Samla.
Kane ka jingrakhe ïa ka Youth Week kan kut da ka jingrakhe ïa ka Youth Sunday lane ka Sngi U Blei ba kyrpang jong ki Samla ha ka 4 tarik u Nailur 2022.
Lah ban kdew hangne ba ïa ka jingrakhe ïa ka Youth Sunday la sdang nyngkong eh ha ka snem 1968 ha ka Balang Umpanai. Ha ki snem kiba kham hadien pat la nang pynbha bad pynshit rhem shuh shuh da kaba la pynlong ruh ïa ka jingrakhe ïa ka Youth Week.
Ka theme jong ka jingrakhe mynta ka snem ka long “Ki Samla Khristan kiba Shlur”, ba la pynshong nongrim na ka Kitab u Joshuwa ka Lynnong kaba 1 ka dkhot ba 9.
Ki Jingïaseng Samla baroh shi taïew ki bunkam ban pynlong ïa ki Prokram kiba kynthup ruh ïa ki Prokram ban ai jinghikai ïa ki samla halor ka jingsniew jong u drok, ka kyiad. Nangta ka jinghikai halor ka rukom pyndonkam ïa ki Social Media. Don ruh kiba la pynlong da ki Drama, ki Skit, ki jingiatyrko nia, ki jingïakop rwai. Don ruh kiba pynlong ka jingïaphylliew jingmut halor ka saiñpyrthei kaba khuid bad kiwei kiwei de ki mat.
Nalor kine ki don ruh ki Prokram jingïaseng ïalap, ki prokram leit jngoh ïa ki khunswet, ka jingai snam sngewbha bad la ki Jingïaseng Samla ki pynkut ïa ka jingrakhe ïa ka Youth Week da ki jingïalehkai Sports baroh shi sngi, ha kaba ym tang ki Samla kiba ïashim bynta, hynrei ki khynnah, ki longkmie bad ki rangbah ruh ki ïashim bynta lang da ka jingshongshit.
Ïa ka theme jong ka jingrakhe man la ka snem la pynbit pynbiang da ka Jingïaseng Samla KJP Assembly. Ka Jingïaseng Samla KJP Assembly kadei ka bor kaba kdup lang ïa ka Jingïaseng Samla KJP Synod Mihngi bad Jingïaseng Samla KJP Synod Sepngi.
