Ai ïa ka Blueprint kumno phin weng ïa ka jing dheng kali ha Shillong, pan ka HC na ka sorkar

Shillong, Nailar 29 : Ka ïing bishar High Court jongka jylla mynta ka sngi ka la bthah ïa ka sorkar jylla ban ai ïa ka Blueprint na ka bynta shipor bad kumjuh ruh kaba la pynkhreh ban weng junom ïa ka jingdheng kali ha kane ka nongbah Shillong.
Haba bishar ïa ka mukotduma PIL da ki arngut ki nongbishar u Chief Justice Sanjib Banerjee bad u Justice W Diengdoh la pynpaw ba u Advocate General jongka sorkar u la mynjur ban pan buit ne jingïarap na ka Indian Institute of Management (IIM), Shillong lada ka long kaba lah ban pynkhreh ïaka Blueprint kumno ban weng syndon ïa kane ka jingeh ba ki paidbah ki ïakynduh ha kane ka nongbah na kane ka jingdheng kali eh.
“ Ka long kaba donkam eh lada pynkhreh ïa ka map jongka nongbah Shillong bad thaw lad kyrkieh shwa kumno ban weng ïa kane ka jingdheng kali khamtam lada don ki jaka ba pynbha ïa ki surok bad kyrpang kawei pat ka jingpynkhreh ka long kumno ban weng syndon ïa kane ka jigneh ha kane ka nongbah. Namar la donkam ban thaw lad kyrpang ban weng noh ïa kane ka jingeh ha kine ki khyndiat bnai bad na ka bynta ka ban ïai neh shirta pat donkam ban pyndep ïa kane ka projek hapoh san lane hynriew snem”, ong ka hukum ba la pynmih da ka iing bishar.
Hooid ka long kaba eh ba ka sorkar kan thaw lad wut wut ban weng ïa kane ka jingeh namar ka sorkar ruh ka duna ka pisa tyngka bad wat ki briew ruh, hynrei ka Blueprint ka dei ban don khnang ba lyngba kane dei ban bud bad pyntreikam ryngkat ka jingdon ka pisa tyngka.
Hooid ki don bun ki lad kiba donkam ban pyntreikam ban weng ïa ka jingeh bad kawei na kita kiba ka sorkar kan pyrshang ka dei ka jingwanrah ïa ki bus electrict.
Nalor kata ka sorkar ka la pyrshang ruh ban thaw lad kumno ban pyndonkam da ki bus na ka bynta ban leit on bad leit shaw skul khnang ban pynduna ïa ka jingmih ki kali ha surok. Kawei pat ruh ka long thaw lad biang kumno ban kham pynduna ïa ka jingdheng khamtam ha kito ki jaka ba jur bha ka jingkhapngiah.
Ka ïing bishar ka pynpaw ba donkam ban shim bun ki lad ki lynti nalor kata ka la pynpaw ba wat tang ïa ki nongdie madan ba pynkhapngiah ïa ki lynti ïaid kjat kat haduh ba ki briew kin hap ban ïaid na surok kaba la pynsuki ïa ka jingïaid jong ki kali ruh ym pat shym la leh satia.
Nalor kata ka la ai jingmut ba ka sorkar ka dei ban phai khmat sha ki Ropeways bad ki Cable Cars ruh namar khlem pep kin don bun ki kompani ne ki tnad bei tyngka kiba kloi ban wan beit tyngka ïakine ki projek ruh.
Na ka liang u nongujor ia ka mukotduma u bah Philip Khrawbok Shati u la pynpaw ba ka sorkar ka dei ban ai da ka jingthoh kiei ki lad ki lynti ba ka shim ha kine ki hynriew bnai ba la dep ban pynduna ïa kane ka jingdheng kali bad kiei kiba ka pynkhreh ban weng syndon ïa kane ka jingeh ha ki por ban sa wan.