Jowai, Jylliew, 30: Ka shad Behdeiñkhlam kaba saw sngi lai miet kaba la sdang naduh ka sngi Pynsiñ (Sngi U Blei) ka long kaba iphuh iphieng ha ryngkat ka jingrisa bad ka jingud ka bom ka bhuri da ka jingïashim bynta da ki khun ka Chilliang Raij (Khon Raij) ha kaba ki la leit rah na khlaw ïa ka “Symbood Khnong” bad pynpoi ha ‘Tre Kjat Loomsooïung’ New Hill Jowai.
Ïa ka shad shad Behdeiñkhlam la sdang naduh ka por mynstep da ka bam Tyngkong ha ‘Iung Langdoh’ nangta ki khun ka Seiñ Raij Jowai ki la pynkhreh ïa ka siang ka pha ban pyndep da ka kmie jong ka ïing kum ka jingburom ïa kiba la khlad na sla jong kane ka pyrthei.
Katba ha ka por janmiet, ki khun ka Chilliang Raij (Khon Raij) ki la leit rah na khlaw ïa ka “Symbood Khnong” ryngkat ka shad ka kmen, ka pud ka tem ha shi lynter lynti haduh ban da poi ha New Hill, Jowai.
Lashai ka sngi ba ar kaba dei ka ‘Mulong’ naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por janmiet baroh ki Kmai Raij naduh ka dong Panaliar, Dulong, Lumpyrdi ïongpiah, Lumïongkjam, Tpep-Pale, Lumkyrwiang kin pynpoi ïa ki Dieñkhlam ha Iawmusiang ha ryngkat jingshad jingkmen, katba ki khun ka Raij kin pynpoi ïa ka ‘Khnong Blai’ ha Loo Sooïung.
