Sdang ka Annual Sports Meet jong ka Rosario Secondary School, Mawsiatkhnam

Shillong, Lber 20: U MLA barim ka Mawlai-Bah Process T Sawkmie, u la pynpaw ïa ka jingsngewkitram halor ka jingtrei shitom jong ki sister ban kyntiew ïa ka pule puthi bad kiwei ki kam shakri Blei ha ka jylla.
U la pyrto ïa ka jinglah ban aiti lut jong ki ha ki kam ba ki shakri bad halor ka jingnohsynnïang ban kyntiew ïa ka imlang sahlang.
Ïa kane u bah Sawkmie u la pynpaw haba ai jingkren kum u kongsan ha ka sngi Balang ka 20 tarik u Lber, 2024 haba plie pyrda ïa ka Annual Sports Meet jong ka Rosario Secondary School, Mawsïatkhnam ka skul kaba dang hap hapoh u pud u sam jong ka Mawlai Konstitwensi.
Ha kane ka sngi u bah PT Sawkmie u la kyntiew ruh ïa ka lama kum ka dak ba la plie ïa ka Annual school sports kaba lai sngi kaban kut ha ka sngi Thohdieng ka 22 tarik u Lber, 2024 ha ka jingdon ryngkat i sister headmistress, Bakhmihlang Rangtong, i sister A. Thongni, ki nonghikai bad kiwei kiwei.
Ha kane ka sngi la ioh ban sakhi ïa ka March pass na ki house, ba kynthup ïa ka yellow, red, green bad blue, ka jingshad, jingrwai, ka dril bad ka jingïamareh 100 mitar.
U bah Sawkmie u la pynpaw ruh ba ki don ar bynta na ka bynta ki khynnah ha ka sport, ka professional bad ka fitness.
“Kin don ki khynnah kiban angnud ban long professional ne ban im ja da ka jingïalehkai sport bad don pat kiban ïalehkai na ka bynta ban bha met bha phad bad ban ïoh ïa ka met bakoit bakhïah” la ong u Bah PT Sawkmie.
Ha kane ka sngi la ïoh ruh ïa ka jingkren na i sister headmistress iba la ai khublei ïa u bah Sawkmie halor ka jinglong la kloi jong i ban don ryngkat bad ki ha kane ki jingpynïalehkai sport ba shisien shisnem jong ki.
I la pynpaw ruh ïa ka jingsngewnguh halor ka jingnohsynnïang u bah Sawkmie sha ki na ka bynta kane ka jingïalehkai sport.