3 rupa,14 tylli rnong khur ka Meghalaya ha ka sngi ba lai jong ka 3rd North East Games ha Nagaland

Shillong, Lber 20: Ka kynhun ki nongïalehkai ka Meghalaya hynne ka sngi ki la ïoh ban khur bun tylli ki takma rnong bad katto katne ki rupa na ka 3rd North East Games kaba long ha Nagaland hynne ka sngi.
Ka Meghalaya ka la ïai bteng ban tyngshaiñ ha ka ïakop mareh, ha kaba ka Ritina Hanse ka la jop takma rupa ha ka thup ïakop women’s 400m race. Ka la lah ban pyndep hadpoh 1 minute, 2.05 sekon. Kiwei pat ki takma rnong la khur da u Kyrshanlang Shylla, Repol Dkhar, u Renaldi Dhar bad u Henry Yoga A Sangma, kiba la wan kyrdan ba lai ha ka 4x100m men’s relay bad shimpor 44.22 sekon ban pyndep.
Ha ka pencak silat ka kynhun Meghalaya, ba kynthup ïa ka Usefulness Lyngdoh Nongum (women’s -70kg) bad u Kyrshanlang Lyngdoh (men’s -50kg) baroh arngut ki la ïoh ban rung sha ka final ha ki kyrdan jong ki hynrei ki la hap ban hun da ki takma rupa hadien ba shahrem ha ka wat ba khadduh. Sa kiwei pat ki takma rnong la khur da ki nongïalehkai ba kynthup ïa Indoarbiushbirth N Marak (men’s -45kg), Lakshmi Rabha (women’s -60kg), Joplin Kharkylliang (women’s -65kg), Pranjal Rabha (men’s -65kg), Sanju Rabha (men’s -60kg) bad Moon Moon Rabha (men’s -70kg).
Ha ka Wushu kaba la kut hynne ka sngi ka jylla ka la ïoh ban khur san tylli ki takma. Ki kynthei kiba la khur takma ki long ka Juliana Blah (45kg) bad ka Bashisha Nongrum (48kg), katba na ki shynrang ki long u Wanpher Kharkongor (56kg), Francis RR Songthiang (65kg) bad Mewanpynshngain Nongrum (70kg).
Ka Meghalaya ka la ïoh ruh ban khur ar tylli ki rnong ha ka table tennis. Ka kynhun kynthei ba khur takma ki kynthup ïa ka Badaaihun Diengdoh, Di Toomi Ch Momin, Wanpyntngenlang Lyngdoh bad Ilapynkmen Synrem, katba ki shynrang ki kynthup ïa u Jeff AK Marak, Suranjit Dey, Sandeep Kumar bad Prithvi Dey.
Ha ka basketball, ka kynhun lehkai ki shynrang ka la shahrem ha ka Mizoram, kiba la pynliem da 88-39.
Ha ka phutbol, ka Meghalaya ka la wanphai jingjop hadien ba rem ha ka Arunachal Pradesh hynnin ka Sngi Hat Majai ban pynliem ïa ka Tripura da 2-1 kol.
Ha ka Boxing ka Riteeka Sarki ka la ïohrung semifinal ha ka 57kg women, kaba mut ba ka ladep ban pynthikna ïalade ban khur takma rnong. Bad ruh hynriew ngut ki nongïakura ha ka men’s division ki la ïoh rung semifinal – ba kynthup ïa u Sanjeev Maskut (48kg), Khrawbok Marwein (51kg), Banjop Nongkhlaw (54kg), Sunil Limbu (57kg), Ram Lyngdoh (60kg) bad u Bhalang Shadap (67kg).
Ha ka Archery ka kynhun ki thei ki la ïoh rung sha ka final, kaba la pynthikna sa kawei pat ka takma na bynta ka Meghalaya. Hynrei, ka kynhun ki shynrang ki la shah rem noh ha ka Assam.
Ha ka badminton ka jylla kam da seisoh bha, ha kaba saw ngut ki samla shynrang ki la khyllem noh hadien ba shah rem ha ka jingïakhun para marwei, bad ruh ha ka women’s single bad mixed double hynne ka sngi.
Haba phai sha ka tennis, lai ngut ki nongïalehkai ki la shah pynkhyllem noh ha kawat ïakhun pre-quarterfinal katba ka Sasha Kharbuli ka la bteng ïa ka lynti ïaid jong ka hadien ba ïohrung sha ka Quarter Final ka ban long mynta ka sngi.