Shillong, Nailar 22: Ka lympung ïalehkai karate ba la tip da ka 30th Inter School & 12th Inter College Karate Tournament, ba la pynïaid da ka All Meghalaya Karate-Do Association, ka la sdang ha ka Sngi Palei ha Sports Authority of India ha NEHU.
Mynta ka kynti ki la don haduh 609 ngut ki nongïalehkai karate kiba la ïashimbynta, kaba la tam palat haduh 100 haba nujor ha u snem 2023. Kine ki nongïashimbynta kidei kiba la jied na ki 95 tylli ki skul bapher bapher bad hynñiew tylli ki Kolej kiba don ha Meghalaya.
Ha kane ka lympung ka ban ïaid lai sngi lynter, ba la kyrshan da ka tnat ïalehkai jong ka sorkar jylla, yn sakhi ïa ki rynsan ïakop ha ka kata (demonstration of form) bad kumite (sparring) ban pyni da ki khynnah lehkai, kiba la pynlut por da ki taïew bad bnai ban pynkhreh na bynta kane ka lympung.
Kumba marshiteng na kine ki khynnah kiba la wanïashimbynta ki dei kiba hap hapoh 10 snem, ka bynta kaba khraw kaba pyni ïa ka jingpaw nam ka Karate ha kane ka jylla. ïa kane ka la kdew da ki riew pawkhmat kiba la ai jingkren ha kane ka sngi plie pyrda.
Ka kong Isawanda Laloo IAS, Secretary jong ka tnat Sports and Youth Affairs ka Sorkar jylla, ka la wan kum ka Kongsan ha kane ka sngi. Kiwei pat kiba la don ryngkat ha kane ka sngi ki kynthup ïa u Working President bad General Secretary jong ka Meghalaya State Olympic Association, u Bah John F Kharshiing bad u Bah Shri Finely L Pariat.
Haba ai jingkren ha kane ka sngi, ka Kong Isawanda Laloo ka la pynpaw ba ki don tang katto katne ki synjuk ïalehkai Sports ha ka jylla kiba mad ïa ka jingseisoh kum ka AMKA, kaba la sei palat spah ngut ki nongïalehkai kiba khur takma ha ki rynsan ïakop hapoh ka ri, khlem da kdew ïa ki nongïalehkai karate ka jylla kiba la ïoh mihkhmat ïa ka India ha ka South Asian Games bad Asian Games.
“Ka jingbei tyngka ïa ki khynnah mynta kan long ka jingmyntoi ban seisoh ka lashai,” ka la ong. “Ngi sngewthuh ïa ka jingdonkam ba Ngi dei khmih bñiah naduh ka por ba ki dang khynnah – ban lap ïa ka sap ba kyrpang ba ki don bad ban wanrah ïa ki lad ki lynti ba kin nang kiew shaphrang. Ka jingpyrshang na ka Sorkar ka long ban don ka jingïatreilang bad ka MSOA bad ki synjuk ïalehkai bapher bapher (sports association).”
U Bah John F Kharshiing u la pynkynmaw ba ka lympung ïalehkai Karate Inter-school ka jam sha u mawmer ba 30 ha ka sien pynlong. “Nga ai khublei ïa ka AMKA kaba la ïaineh bad shimkhia ban pynlong ïa kane ka lympung. Dei na kane ka daw ba ka don shibun ki nongïalehkai karate kiba ïashimbynta. Kane ka dei kawei na ki synjuk kaba heh tam ha ka jingdon ki nongïalehkai bad ka AMKA ka dei hok ban ïoh jingïaroh na bynta kane,” u la ong
