Kolkata, Nailar 22: Ka Durand Cup lyngba ka Organising Committee ka la pynbna ïa ka khubor kaba sngewtynnat katkum ka jingkwah u paidbah kiba ieid phutbol da kaba pynkynriah ïa ka jaka bad tarik ïalehkai na bynta ka jingïakhun semifinal ha kane ka lympung Durand Cup kaba dang ïaid mynta.
Ka jingïatyngkhuh bor hapdeng ar tylli ki klob ka thaiñ shatei lam mihngi lane ka Northeast Derby, kata hapdeng ka Northeast United FC pyrshah ïa ka Shillong Lajong FC la ïoh ban pynkynriah noh ha ka 26 mynta u Nailar (Lah Sngi U Blei) ha ka por 5:30 baje nohphaisngi ban pynïalehkai ha JN Stadium, Shillong.
ïa kane ka rai ban pynkylla la shim hadien ba la ïoh ïam ka resol jong ki jingïakhun quarterfinal ba la long ha ka Sngi Balang. Baroh ar tylli ki quarter final la sakhi ïa ka jingïalehkai kaba itynnat na ka Northeast United FC bad ka Shillong Lajong FC, kiba ki namjop jong kine ki ar tylli ki klob ka la pynkhihwin bad wanrah jingkmen ïa u paidbah kiba la wan ban kyrshan.
Kum ka jubab ban pynhun ïa ka jingkyrpad ki nongkyrshan jong baroh ar tylli ki kynhun, bad kum ka jingithuh ïa ka tynrai bad ka jinglong jingman ka jaka ba ki nongkyrshan ki la jied, Ngi la rai ban rah ïa ka jingïakhun semifinal hapdeng kaNortheast United FC bad ka Shillong Lajong FC ha nongbah Shillong bad la pynkynriah ïa ka tarik shi sngi hadien, kata ha ka 26 mynta u Nailar.
Kane ka rai ka thmu ban pynthikna ba ki nongkyrshan, kiba long u budlum ba pynshong shit ïa kane ka lympung, ki lah ban mad ïa ka jingïalehkai kaba kongsan ha ka jaka ba ki ïohlad ban ai ka jingkyrshan ba pura ïa la ki kynhun.
Ngi ngeit ba kane ka jingpynkylla kan pynsngewtynnat bad pynshongshit ïa u paid bad ba ki kynhun kin ïoh ïa ka jingkyrshan ba pura kaba ki dei hok ban ïoh katba ki dang ïakhun ban ïohrung sha ka final.
Ka Organising Committee jong ka Durand Cup ka la pynpaw ruh ïa ka jingsngew nguh ïa ka tnat ïalehkai jong ka Sorkar jylla West Bengal kiba la sngewthuh da ka jingsngewrit ban pynurlong ïa ka jingangnud ki paid nongkyrshan phutbol ka thaiñ shatei lam mihngi (Northeast) haba kyllumlang bad khamtam na jylla Meghalaya ban pynlong ïa kane ka jingïalehkai ha Shillong. Ngi khmihlynti ïa ka Semifinal kaba itynnat bad ka ban pynsah jingkynmaw ïa ka Durand Cup. Ka DCOC ka ai khublei ruh ïa ki paid ieit phutbol kiba shlur na bynta ka jingkyrshan kaba ki la ai, ryngkat ka jingsngewthuh bad ka jingïatreilang.
Kumban shu pynkynmaw, kane ka 133rd IndianOil Durand Cup ka la sdang naduh 27 tarik u Naitung, 2024, bad ka Final la pynkhreh ha ka 31 tarik mynta u Nailar, 2024, ha Vivekananda Yuba Bharati Krirangan, Kolkata. Bad ki la don haduh 24-tylli ki kynhun, kiba ïakhun mynta u snem, bad kawei ka kynhun na bar ri, na Nepal ryngkat bad 12 tylli ki klob ba ïakhun ha ka lympung ba kham heh ha India, ka Indian Super League (ISL).
Katkum ka prokram ba la pynbeit naduh ba sdang ïa ka lympung, ka nongbah Shillong ka dei tang ban ïoh pynlong ïa ki jingïalehkai jong ka Group-F, hynrei ka jingbym thikna ka jinglong jingman ha Kolkata la pynkynriah noh ïa ka jingïalehkai Quarter final kaba ar hapdeng ka Shillong Lajong bad ka East Bengal (ïa kaba ka Lajong ka la jop da 2-1 kol) ban shah pynkynriah ha JN Stadium, Shillong.
Bad sa shi sien pat ki nongkyrshan kin ïoh ban sakhi biang ïa ka Durand Cup ha Shillong, ha kaba ka Shillong Lajong FC kan aireng pyrshah ïa ka Northeast United FC ha ka Lah Sngi U Blei ban ïaknieh rung sha ka final.
