Wat hapdeng ka jingshah rem ha ka elekshon Lok Sabha ha baroh artylli ki Parliamentary Constituency, kata na Shillong bad na Tura, pynban ka NPP ka la nang ïoh bor ha Assembly da ka jingwan pynïasoh ki 3 ngut ki MLA ka Seng Congress, kata u Bah Charles Marngar, MLA ka Mawhati, u Bah Gabriel Wahlang, MLA ka Nongstoiñ bad u Dr. Celestine Lyngdoh, MLA ka Umsning. Kane ka jingwan pynïasoh kine ki 3 ngut ka la long kum ka jingai mynsiem ïa ka NPP bad pynkhlaiñ bor ïa ka ha ka Legislature Party, namar mynta ka Seng ka la don 31 ngut ki MLA kaba long ka number kaba la biang ïa ka ban synshar hi marwei ha ka ïingdorbar Thawaiñ kaba don 60 ngut ki MLA.
Hynrei ka jingïakren kiba bun balang ka long, kaei kaba pynlong ïa kine ki 3 ngut ki MLA ka Congress ha ka por ba ka Seng ka la sdang ban khie rasong biang ha ka jylla da ka jingjop u kyrtong ka Seng, u Saleng Sangma ïa ka elekshon MP na Tura bad ka jingtam u Kyrtong ka Congress, u Bah Vincent Pala ïa ka NPP na Shillong, wat lada um shym la jop ruh. Kumba la pynpaw da kine ki 3 ngut ki MLA ba ka jingphet noh jong ki na ka Congress kaba shong ha ka Liang Pyrshah, kadei namar ba kim wan lah ban wanrah ïa ka roi ka par ha ki Constituency jong ki bad kim lah ban pynbiang ïa ka jingdonkam jong ki paidbah lymda ki don ha ka liang Synshar.
Kane ka pynkynmaw ïa ka jingkren jong u Myntri Rangbah ba la khlad noh u Dr. Donkupar Roy, mynba u dang shong ha ka Liang Pyrshah kum u Nongïalam, ba ka ka jingtreikam jong kano kano ka sorkar kam dei ban long kaba lah shiliang ne kaba noh shiliang, kaba mut ba ka sorkar kadei ban peit ba ka roi ka par kadei ban leit sha baroh ki 60 tylli ki Constituency jong ka jylla. Kam dei ban leit tang sha ki Constituency kiba long Minister ne ki MLA ba don ha ka Liang Synshar. Ïa kane u Dr. Don ym dei ba u kren tang shisien ne arsien, hynrei u ju kren bunsien ha Assembly ruh.
Ha ki snem kiba kham mynshuwa ha ki por ba long Myntri Rangbah u Bah BB Lyngdoh, Salseng Marak, u Bah DD Lapang, u Bah EK Mawlong, u Bah JD Rymbai, ym ju kham ïoh sngew ba ki MLA kin ud shaphang kata ka jingshah leh shiliang khmat ne ka jingbym ïoh ka roi ka par, namar ka jingtreikam jong ka sorkar kam long ban ai kam pynroi tang sha ki jaka ne ki Constituency ba mihkhmat da kiba long Minister. Hooid, ka lah ban long ba ki don ki khep ba ki MLA ba long Minister ki lah ban kham ïoh tam ïa kiwei ki MLA ha ki kam pynroi, hynrei kam dei pat kum mynta ba ki MLA ba shong ha ka Liang Pyrshah kin nym ïoh eiei lane ka sorkar kan nym ai kam pynroi eiei sha ki Constituency ba mihkhmat da ki MLA Liang Pyrshah.
Kane kadei ym dei ba ka hiar dor jong ka Saiñhima Sima ha ka jylla ne ka jinghiar ka synshar ka khaddar, kadei ruh ka daw bah kaba pynlong ïa ka jylla ba kan hiar ha baroh ki liang. Kam lah ban long ba ka sorkar kan ai scheme ne ai projek tang sha ki jaka jong ki Minister. Hato kita ki jaka ba mihkhmat ki MLA ba don ha ka liang Pyrshah kim dei mo ki jaka kiba hap ha ka jylla. Hato kam dei mo ka kamram jong ka sorkar ban peit ba ki jaka kiba dang sahdien yn kham ai ki kam pynroi. Dei namar kane ka daw ba mynta la ju ong ba ka jylla ka don tang ki Politician kam don shuh ki Statesman ne lane kita ki nongsaiñdur kiba stad.
Kane ka jingleh shiliang khmat ïa ki MLA Liang Pyrshah ka la sdang naduh ka snem 2013 ter ter bad ka bteng sa sah u 2028 bad ka kham jur ha u snem 2023 ter ter. Ki MLA ne ki paidbah na ki Constituency ba don ha ka Liang Pyrshah ki mad ïa ki jingeh ha ka liang ki surok, ki lynti ki syngkien, ki umbam umdih bad kiwei kiwei namar da leit ud katno katno ruh wat ki Ophisar, ki Engineer ruh imat ki ïoh jingbthah bay m dei ban ai sha ki jaka ba don ki MLA Liang Pyrshah, hap ban burom beit ïa ki Minister.
Kane ka lah ban dei ka buit jong ki Party kiba don ha ka Sorkar ban pynhiar kput ne ai jingsneng ïa ki paidbah ki bym jied ïa ki Party jong ki. Hato kata ka synshar paidbah kadei ha kane ka dur?. Lada peit pat ha ka sorkar pdeng kam da don than kata ka jingleh shiliang ïa ki jylla ki bym dei na ka Party ba synshar ha Delhi. Ha ka por ba synshar ka Congress ha Meghalaya bad na Delhi pat synshar ka BJP, ka Meghalaya ka ïoh bun ki Central Scheme. Kum ka surok Shillong By Pass, ka surok National Highway na Shillong sha Tura bad kiwei kiwei, kaba pyni ba ki nongsynshar ha Delhi kim long kum ki Nongsynshar ha kane ka jylla. Lada ka long ha kane ka dur ka paw ba ki nongsynshar ha kane ka jylla kidei kiba khwan myntoi shimet bad kiba khim jingmut bad kim long fit hi ruh ban don ha ka bor synshar.
