Nongstoiñ, Risaw, 25: Bun ki paitbah kiba la ïoh pdiang ïa ki sniang ha ka sngi ba u Conrad Kongal Sangma Myntri Rangbah ka jylla, u ba la wan ha Nongstoiñ ha ka sngi hatmajai jong ka taïew ba la dep, ki la babe namar ba tang hadien saw bad san sngi ki la don ki snïang kiba ïap.
U bah Wanteibok Lyngdoh secretary ka Hynñiewtrep Youth Council West Khasi Hills, u la ong ba lada ka don shisha ka jingïap jong ki sniang bad ka lah ban dei ba kiba ïoh ïa kitei ki sniang kim shym la sumar bha. Lane ka lah ban long, ba shuwa ban ai ha ki paitbah, kitei ki sniang ki la kem tlot lypa namar la wan kit da ka kali. Tangba kaba donkam ka long ba ki trai jong ki snïang kiba ïap kim dei ban shu bret sha lum sha wah, hynrei ki dei ban tep bha ha khyndew khnang ba lada ki dei kiba ïap na ka daw jong ki jingjait jingpang kan ym saphriang sha kiwei pat.
Ula ong ruh ba ha ka jingshisha ha shuwa ban sam sha ki paitbah, la dei ban dap hah eksamin shuwa ha ki doktor jong ka tnad Veterinary ban lap la ki dei ki sniang kiba shait ba khlaiñ ne kiba don jingshitom.
