Ka kharkhana Mawmluh Cherra Cement Ltd (MCCL) kaba dei ka karkhana pynmih dewbilat kaba nyngkong eh ha ka jylla Meghalaya bad kaba long ruh kum ka pliang ja jong ki paid ka thaiñ Sohra baroh kawei, mynta ka la sangeh ban treikam namar ba ka bam hati kit kulai palat. Mynta ka sorkar ka pyrshang ban khyllie pat ïa kane ka karkhana da kaba yn ïateh bad soi ïa ka soskular kum ka Joint Venture bad ka Bhavika Commercial Private Limited (BCPL) kaba na Kolkata.
Kawei kaba pynlyngngoh ka long ba ki don bun ki karkhana pynmih dewbilat ha East Jaintia Hills kiba paw kum ka Star Cement, ka Dalmiya, Topcem, wat ka Lafarge-Umiam Private Ltd haNongtrai, East Khasi Hills bad kiwei kiwei. Hato ka sorkar ka la tyrwa ne em ban ïatrei lang bad kitei ne balei ban ïatrei lang bad ka BCPL kaba dei ka kompani kaba ym pat da paw nam bha bad kaba dang sdang treikam ruh dang ha u snem 2011.
Ka Lafarge lei lei ka tih ïa u mawshun na Nongtrai bad phah sha Bangladesh bad ïa ka jingïoh jong kane ka kompani bad kitei ki kompani ha ka shisnem shisnem ru lah ban tip tang shu leit na ki website jongki. Katba ka jingïoh jong ka BCPL pat kam don ha ka website jongka bad kumta kane ka buh ha ka jingartatien ïa kiba bun hato lyngba kane ka jingïatrei lang ka MCCL kan khyllie ne khyllem pynban.
Ka long kaei kaei kaba sngewsih ba kane ka komapani MCCL kaba la paw nam bha ha ki por ba mynshwa namar ka dewbilat kaba kane ka kompani ka pynmih ka dei kaba khlaiñ bor bha ban ïa kiwei ki dewbilat jong kiwei ki karkhana. Hynrei kaei pat kaba pynlong ïa kane ka karkhana dewbilat ban dap ram rynjaiñ kat haduh bym lah shuh ban pynïaid shakhmat ïa ki kam ki jam ruh.
Kawei na ki daw ka long ba ïa ka MCCL imat la shu pynïaid da ki briew kiba ym pat pyndep ïa ki jingpule ba pyntbit ha ki liang ban pynïaid kompani. Nalor kata wat ki nongtrei jongka MCCL ruh ki shim ba ka dei kum ka kam sorkar kam dei ka kam kompani. Nalor ba la shu thynnian jubor ïaki nongtrei ha kane ka karkhana, ka rukom treikam pat kam biang namar ka por leit bad ka por wan ruh kam long kaba pyrkhing kumba long ha kiwei kiwei ki kompani jong ki riew shimet.
Hynrei haba trei ha kano kano ka kompeni hap pynïaid katkum ki kyndon kiba la buh da ka kompeni bad kita ki kyndon ki long kiba pyrkhing. Ym lah ban shim shuti katba mon lane ban wan trei slem bad leit phai sha ïing dang kloi. Bunsien hi ki briew jongngi kim sngewthuh ïa kane ka kolshor trei kam jong ki kompeni bad ki sngew ba ki lah ban leh mon kumba leh ki nongtrei sorkar. Dei na kane ka daw ba ki kompeni ba pynïaid ka sorkar baroh ki pheil lut, naduh la MeECL haduh ka MCCL. Shu kit tang ka ram shi rynjain.
Kumta khnang ba ka MCCL kan khyllie biang lehse da ka jingïatrei lang bad ka BCPL ki bor pynïaid ki dei ban pynkylla nadong shadong ïa ka rukom treikam bad ki dei ruh ban ym thung palat bun ki nongtrei hynrei katba lah ban pyndep ïa ka kam khnang ba kan ym long shuh ka karkhana bam hati kit kular.
Nalor kata ka sorkar ka la dei ban ïa soi ïa ka soskular ba ki ban pynïaid ïakane ka karkhana ki dei noh ban dei kiba la dep pyntbit ha ki jingpule bapher bapher la ka dei ban peit ïa ki machine, ïa ka jingpynmih dew bilat, ïa ka rukom buh jingkheiñ jingdiah, ïa ka rukom pynïaid ïew ïa ka dewbilat bad ter ter khnang ban ïohi pat sa shisien ba ka nam bad kaburom jongka MCCL kan paw biang bad kan ym long tang ïa ka thaiñ Sohra hynrei ïaka jylla hi baroh kawei.
