K a ïingdorbar Lok Sabha kaba 18 ka la sdang treikam mynta ka sngi haba la pynsmai ïa ki dkhot ba shah jied thymmai, kynthup ïa u Myntri Rangbah duh u Narendra Modi bad kiwei kiwei ki MP kiba la dep ban bam smai kum ki Myntri ka sorkar NDA 3:0. Ka jingpynbam smai kan bteng lashai ka sngi sa kiwei pat ki MP kynthup ruh ïa ki arngut ki MP jong ka Meghalaya, u Dr. Ricky AJ Syngkon bad u Salseng Sangma.
Lah ban kdew hangne ba u Narendra Modi u la shimti biang kum u Myntri Rangbah duh jong ka ri India ha ka sien kaba lai kaba ïaryngat bad ka jinglong Myntri Rangbah jong u (L) Jawaharlal Nehru.
Wat lada ka BJP kam shym la lah ban thaw sorkar tang marwei, hynrei da ka jingkyrshan kiwei pat ki Party, khamtam ka Telegu Desam ne TDP bad ka Janata Dal (United) ka BJP ka la lah bah thaw sorkar biang sa shisien kaba la ailad ruh ïa u Modi ban bteng biang ha ka sien kaba lai lynter naduh u 2014. Hadien ba ladep bam smai ha ka Sngi U Blei, u Modi ha ka sngi nyngkong u la sam doh kyndang sha ki 72 ngut ki Myntri ka sorkar jong u. Ha kane ka jingsam ne bate kam, la ïohi ba ka BJP kam shym la kheiñ snep satia ïa kiwei pat ki Party ba ïatreilang, hynrei ka la bat hi halade ïa ki kam kiba heh baheh kum ka Home, ka Defence, ka Finance bad kiwei kiwei.
Kane ka jingïoh ki Myntri na ka Seng BJP ka lah ban pynsngewsih ïa u Chandrababu Naidu jong ka TDP bad u Nitish Kumar jong ka JD(U) kiba ha kine ki sngi kiba ladep la mih khubor ba kim sngewtynnad ba u Amit Shah un dang bat biang ïa ka tnad kam pohïing. Kane ka jingbate kam u Modi ka pyni ruh ba ka BJP ka la pynneh ïa kiba bun ki kam ha kijuh ki Myntri na ka sorkar baladep, kum ka Defence, ka Home, ka Finance, ka Road Transport and Highways.
Ha kajuh ka por ki khubor ha ri India ki pynpaw ba namar ba ka BJP kam lah ban thaw sorkar hi tang marwei, ki arngut ki “King Maker”, u Naidu bad u Kumar kin khyrwait shabi ïa ka sorkar jong u Modi. Hynrei ka paw ba kim shym la nud satia ban ong eiei, namar ba wat lada ki la pan shuki Myntri khambun ruh, hynrei kim shym la ïoh kumba ki kwah. Kaba sah mynta ka long satang ïa kam shuki Speaker jong ka Lok Sabha, ïa kaba ka TDP ka la pynpaw ba ka kwah ban ïoh ïa kane ka shuki.
Ïa mynta hi ka sorkar u Modi kan ïaid beit bad kan nym don jingkhih, namar ba u Naidu u dang ïoh lad ban wan biang ha ka sorkar hadien bun bun snem. U Nitish Kumar ruh dang shen u dang wan rung biang ha ka NDA da kaba shet kylla ïa ka Congress bad ka INDIA Bloc shuwa ha ka elekshon MP. Nalorkata ruh ha ka India Bloc ki don kiwei pat ki Party kiba khamtam ma ki ban ïa ka TDP bad JDU kum ka Samajwadi Party, ka Trinamool Congress. Kine kin nym ailad ïa ka TDP bad ka JDU ba kin khyrwait shabi ïa ka India Bloc.
Ka long kaba dei ban kynmaw ruh ba ka BJP bad ka NDA baroh kawei ki la hiar bha ha kane ka elekshon 2024, wat hapdeng ka jingkhmih lynti ba kin jop palat 300 ne 350 ne wat haduh palat 400 Seat ruh, Ka NDA ka la leit sha kane ka elekshon hapdeng ka jingsngew khyllew ba ka la lah ban leh shibun ki kam kiba radbah, kum ka jingleit iuh kjat ka India ha u bnai, ka jinglah ba tei ïa ka Ram Temple ha Ayodhya, ka jingpyntreikam ïa ka CAA, nangta kiwei kiwei de ki kam pynroi.
Hynrei kine ki kam kim shym la long eiei hakhmat ka jingbitar u paidbah ïa ka sorkar NDA namar ka jingsynshar donbor jong ka ha ri India, kaba la paw na ka jingshah khñiot beiñ ki rit paid, ka jingshah thombor ki kynhun niam rit paid, ka jingshah khñiot beiñ ki nongkhaïi kiba kham rit, ha kaba ka sorkar NDA ka la ailad tang ïa ki heh spah ne ki kompeni kiba heh baheh. Nangta ka jingpyndonkam bakal ïa ki bor treikam tohkit kum ka CBI, ka ED, ban kem ïa ki nongïalam seng saiñpyrthei da kaba kem bad set phatok wat ïa u Myntri Rangbah ka Delhi ruh.
Kine ki jingle ki pynpaw shai ba ha ka sorkar ne ka ri synshar paidbah, u paidbah u don ka bor ban pyni tang ha ka por ba jied ïa ki nongmihkhmat ïa kaba kano kano ka sorkar kam dei satia ban kheiñ dew thala ïa u paidbah, namar u paidbah u don la ka bor.
