Shillong, Risaw 26 : Ka Nationalist Congress Party (NCP) ka la pynkhreh ban pynieng haduh saw ngut ki kyrtong ha kane ka elekshon MLA kaban long ha u 2023 ha ka jylla.
Haba kren halor katei ka jingpynkhreh, u President ka NCP Meghalaya ba dei ruh u MLA ka Gambegre, u Saleng A Sangma u la ïathuh ba ka party ka dang jar jar mynta watla kiwei pat ki party ki la sdang ban khihwin ha kine ki ar ne lai bnai bad pyrshang ban pynphriang paidbah ïa ki mat treikam jong ki.
“Namarba na Delhi haduh mynta ki dang jar jar kumta nga ruh ngam kwah ban pynduh mynsiem ne pynshlur ïa ki paidbah ïa mynta hi. Lada nga sdang naduh mynta ka long kumba ka pynjynjar kai ïalade,” u la bynrap biang.
Shuh shuh u ong ruh ba na ka party hi kin pynkhreh ban pynieng tang kumba lai ne saw ngut ki kyrtong na ka bynta ka elekshon kaban long ha u 2023. Haba kylli pat ïa ka daw, u la jubab ba ka daw tynrai hi kadei namar haduh mynta um pat ïoh pdiang kano kano ka jingkyrshan ne ka jingïarap na Delhi.
Kumta, halor kane, u la ong ba u la dep ruh ban rah ïa kane ka ishu bad ki bor bahalor jong ka party la bunsien bha.
“Hynrei namar na Delhi kim da patiaw than kumta nga ruh ngam da khuslai lada kim shimkhia. Tad hadien ba ki sdang ban shimkhia nga ruh ngan sa sdang,” u la ong.
