Shillong, Risaw 26 : U Myntri ka tnad ka Koit ka Khiah ka jylla, James K Sangma u la ong ba u hap ban bishar bniah ïa ki jingmyntoi bad ki jingduh jingmyntoi halor ka jingdawa ba la pynsngew da u MLA ka BJP na Pynthorumkhrah, Bah AL Hek ba dei ban ailad ïa ki doktor kiba shakri ha kane ka jylla ba kin ïoh thied jaka lang ha kane ka jylla.
Halor kane u Myntri u la ong ba u Bah Hek la bun bun snem bha u la bat kum u Myntri ka tnad ka Koit ka Khiah ka jylla bad lada u don shisha ka jingsngewkhia halor kane u la dei ban leh naduh ka por jong u.
“Ngi pdiang lut ïa kino kino ki jingai jingmut kiba wan na ki nongïalam ne ki MLA jongngi bad ïa kine pat ngin sa bishar bniah namar kine baroh ki don beit ïa ki jingmyntoi bad jingduh jingmyntoi. Dei halor kane ka nongrim ba ngin sa lah pat ban bishar bniah kano kaba kham biang bad ïa kata ngin sa shim rai,” u la ong haba kren bad ki lad pathai khubor.
Lah ban kdew hangne ba dang shen u MLA ka Pynthor ba dei ruh u Myntri barim ka tnad ka Koit ka Khiah ka jylla u la ong ba lada ka sorkar jylla ka lah ban ai jaka sha ki ophisar kiba wan trei ha kane ka jylla balei kam lah ban ai kumjuh na ka bynta ki doktor kiba ki paidbah ki donkam beit ïa ki ha ka jingim.
