Nongstoiñ, Ïaiong 02 : Halor ki kam ïalehkai bapher bapher lane Sports ban ong ‘Em ïa u drok’, u Parag Chaturvedi, Commandant SHQ SSB, u la pynshai halor ki jingma kiba ktah ïa ki samla, khamtam eh ki khynnah pule, kiba kynthup ïa ka jingdih drok bad ka jingbam pynbuaid.
U la ong ba ka jingdih drok ka long ka jingeh kaba khraw ha ka koit ka khiah bad ka imlang sahlang, kaba ktah ïa ki briew, ki longïing bad ka imlang sahlang ha kylleng ka pyrthei. U la ong ba la donkam kyrkieh ban pynsaphriang ïa ka jingma jong ka jingdih drok bad ban kyntu ïa ki briew khamtam ki samla, shynrang bad kynthei ban jied ïa ki lynti ba bha.
Ha kane ka jingai jinghikai kaba la long ha Nongstoiñ College dang shen, la pynshai ruh ïa ki jingktah ba sniew jong ka jingdih drok, kynthup ïa ki jingeh ha ka koit ka khïah, ki jingpang ba neh slem, ki jingeh ha ka pyrkhat pyrdaiñ bad ki jingeh ha ka imlang sahlang bad ka ïoh ka kot.
U Bah H. Kerwood Thabah, MCS, ADC West Khasi Hills, Dr. I. Mawthoh, Principal, Nongstoiñ College bad u bah Ruben, Lecturer Nongstoiñ College, ha ka jingdon ryngkat jong ki 164 ngut ki khynnah pule na Nongstoiñ College & St Francis College, ki la kyntu ïa ki khynnah pule ban tip shaphang ki jingma bad ki jingktah jong ka jingdih drok, ban jied ïa ki lad ba bha kum ka jingkilan met, ka bam ba tei met, ki jingpynleit jingmut ha ki sap kiba ki don bad ka jingpynlut por bad ki ba haïing hasem.
Lada don mano mano ba mad jingeh ha ka jingdih drok, dei ban wad jingïarap na ki program jingsumar bad ki kynhun jingïarap.
Ha kane ka jingïalang, la pynlong ruh ïa ka jingphla jingkular ban pynduh ïa ka jingdih drok bad ban pynsaphriang ïa ka jingtip ha ki nongshong shnong ka jylla.
Da ka jingïatreilang, lah ban tei ïa ka lawei kaba lait na ki drok bad kaba koit ba khiah na ka bynta jong ngi bad ka imlang sahlang.
Ka jingphohsniew ka long ban pynlong ïa ka India kaba la kiew shaphrang bad kaba shaniah halade ka lah ban urlong tang lada ki samla ka India ki noh synñiang sha ka imlang sahlang kaba lait na ki drok.
