Nongpoh, Ïaiong 02: Hapdeng ka iwtung kaba shyrkhei kaba mih naka marten kaba don ha Umsning Patarim, ki khynnah skul jong ka Sati Raja Memorial Secondary School man ka sngi ki hap ban sma hala ki jong ki kamra klas bad lehkai sports kumjuh hapdeng ka jingsma namar ka jaka bret ñiut kaba don mar syndah katei ka skul.
Man la ka sngi, ki khynnah skul ki hap ban ring mynsiem ryngkat jingsma, kaba pynlong ruh ïa ki ban mih shabar naki kamra klas bunsien la pynpaw ka kong Balakyntiew Umbah Headmistress haba kren ha ka jingïalang sdang jong ka Annual Sports Meet bala plie pyrda mynta ka sngi bad kane ka jingeh ka la ktah ïa ki khynnah haduh katta katta.
Ka la ong ruh ba katei ka skul kaba la seng da ka RAWA ha u snem 2004, ka dei kaba kyrpang na bynta ki khynnah kiba wan na ki longïing longsem ba duna ka ïoh ka kot. Hynrei, namar ka jingsma iwtung khamtam haka por lyiur ba ki khynnah ki hap ban ïaid lyngba ka um jaboh kaba sma nalor ka jingsniew surok bad bun ki kmie ki kpa ki la pynsangeh ban phah skul ïa la ki khun bad kane ka jingeh ka dang neh haduh mynta bala donkam iaki bor ba dei peit ba kin leh eiei.
Naka liang u samla Gabriel Sun kum u nongïalam ka FKJGP u ba la leit ruh ban shim bynta kum u kongsan ha katei ka jinglehkai sports hadien katei ka jingpynsngew ïaki jingeh u la kular ba kum ka seng kan sa shimkhia ha kaba ïadei bad katei ka jingeh ban ïakren bad ki bor ba dei peit.
