Jowai, K’Lyngkot 23: Ka kynhun ïalehkai jong ka Sohphoh kaba long syndon ka lahduh haka lympung ïalehkai phutbol jong ka “3rd Sniawbhalang Football Tournament 2023-2024” kaba la long mynta ka sngi phainal 23 tarik u Kyllalyngkot ha madan Wahiajer Multi Sports Complex, West Jaiñtia Hills District.
Haba phai sha ka jingïakhun phainal kala long kaba i shongshit bha namar ka jingwan sakhi lang da ki hajar ngut ki paidbah na kylleng ki jaka namar ba ka dei ruh ka sngi ban plie paidbah ïa katei ka madan Wahiajer Multi Sports Complex da u kongsan uba dei u Myntri Rangbah ka jylla u Conrad K. Sangma.
Ha ka jingïalehkai phainal hapdeng ka Nongkhroh pyrshah ïaka Sohphoh, na ka liang ka kynhun jong ka Sohphoh kala jop da 2-0 kol ïa ka Nongkhroh, ïa kitei ki kol na ka Sohphoh la thep da u Sumar Suting haka minit ba 8 bad u Lovingstar Suting haka minit ba 34.
Ha kane ka lympung mynta ka snem ïa ka nam Best Players of the Tournament la ïoh da u Sumar Suting na ka kynhun ialehkai jong ka Sohphoh, ïa ka nam Best Goalkeeper la ïoh da u Embha Rymbai na ka Sohphoh, katba ïa ka nam Top Scorer la ïoh da u Deciderius Pyrtuh naka Nongkhroh uba la ïoh thep haduh 7. Kine ki lai ngut ki rangïalehkai kila ïoh rah mar kawei ka Scooty.
