Hiar jan baroh ki Myntri Sorkar ban plie ïa ka Sports Complex ba 24 klur ha Wahïajer
>> “Kane ka stadium ka la dei ka stadium kaba ryngkat dor bad ki ri ka pyrthei. Namarba ka Meghalaya Games ha u snem ban wan kan long ha rilum Jaiñtia, kumta ngi kyrmen ba ka jingpynkhreh kan dei kaba paka tam bad kan dei ruh kaba heh tam.” Conrad K Sangma, Myntri Rangbah >>“Nga kmen ban ïohi ba ha rilum Jaiñtia kan ïoh kat kane ka stadium. Kadei ka thong ba ha ki san snem ban wan ki kam ïalehkai kim dei ban kiew tang ha ka jylla hynrei ban bat ia ka kyrdan ba nyngkong wat ha ka thaiñ shatei -lammihngi..” Bah Shakliar Warjri, Myntri ka tnad Ialehkai
Jowai, K’Lyngkot 23: U Myntri Rangbah jong ka sorkar jylla u Conrad K. Sangma mynta ka sngi 23 tarik u Kyllalyngkot ula wan ban plie paidbah ïa ka ‘Wahiajer Multi Sports Complex’ ha West Jaiñtia Hills District lyngba ka jingïarap pisa na ka State Plan Scheme & Sports Authority of India’s Khelo India Infrastructure Scheme.
Ïa kane ka ‘Wahïajer Multi Sports Complex’ la wan ban bun mawnongrim da u Myntri Rangbah jong ka sorkar jylla u Conrad K. Sangma haka 29 tarik u Kyllalyngkot 2021 ha ka jinglut ban tei ïa ka kaba la kot sha ka Rs. 24,97,11,000/- tyngka.
Mynta ka sngi la wan ban ïadonlang da ki ar ngut ki Symbud Myntri Rangbah kata u bah Prestone Tynsong bad u ma Sniawbhalang Dhar MLA ka thaiñ, nalor u myntri ka kam ïalehkai Sports bah Shakliar Warjri, u Dr. D. Vijay Kumar, IAS Commissioner & Secretary Sports & Youth Affairs, ka Dr. Ampareen Lyngdoh, u ma Wailadmiki Shylla MLA, ka Santa Mary Shylla MLA, kiwei kiwei ki MLA, MDC nalor ki hajar ngut ki paidbah kiba la wan sakhi ïa kane ka sngi.
U Myntri Rangbah haba kren kum u kongsan ula pynpaw ka jingsngewnguh da kaba ong kine baroh ki dei lyngba ki jingkykhu jong u Blei, haka juh ka por ula ai ka jingïaroh kyrpang ïa u MLA ka Thaiñ u ma Sniangbhalang Dhar uba la trei shitom met bad mynsiem ban pynïaid shaid shaid ïa kane ka project kaba hep hapoh ka District bad ha ka jylla hi baroh kawei.
Ula ong kane jaka ïalehkai kan ïarap shibun eh ïa ki samla ba kin ïoh lad ban pynpaw pyrthei ïa ka sap ka phong ïalehkai na ka bynta ka lawei jong ki bad kan long shisha ka jingkyrkhu kaba khraw na ka bynta ki samla ïalehkai jong ka Ri-lum Jaiñtia.
Shuh shuh ula pynsngew ha kine ki san snem lyngba kane ka sorkar ba mynta kala ïaleh ban pynkiew bha ïa ka kam ïalehkai Sports hapoh ka jylla lada ïa nujor bad ki 40 tylli ki snem ba la dep, ula pynsngew wat ïa ki jaka sumar kum ki PHC, CHC la pynkiew kyrdan ïa ki nalor ka jingtei bad kumjuh ïa ki skul, ki Callege bapher bapher kiba la kiew ar shah ha kine ki san snem bala dep.
U la pynsngew na ka liang ka sorkar kan pynlong ïa ka jingpynkup burom ïa ki rangïalehkai jong ka jylla kiba la jop ha kane ka Meghlaya Games 2024 kaba dang shu dep bad ïa kane ka jingleh burom yn pynlong ha nongbah Shillong.
U Conrad K. Sangma ula ong ym tang haka kam ïalehkai Sports ka sorkar ka ïaleh ban pynkiew ïa ka lad pule puthi ha ki subject bapher bapaher la haka Science ne Mathematic, nalor ki kam seng kam seng jam bad kiwei de kiba lah ban wanlam ha kine ki sngi ban wan.
Ha ka jingkren u Myntri Rangbah ula pynsngew ba ki don ïa ka thong ban pynlong ïa ka phutbol Tournament na baroh ki 60 tylli ki Constituency hapoh ka jylla, ha kaba ki Constituency jong ki MLA ki lah ban ïashim bynta ha kane ka Tournament.
Ïa kane ka Complex la shna ïa ka katkum ka juk ba mynta kaba kynthup lang naduh ki AIFF certified Synthetic Football Turf, AFI certified Synthetic Athletics Track, VIP, ki jaka shong ban peitkai (Galleries), ki kamra pynkhreh jong ki nongïalehkai, ki kamra ophis bad kiwei de ki jingdonkam.