Jowai, Jymmang. 09: Ka Meghalaya Commercial Truck Owner and Drivers Association (MCTODA) Jaiñtia Unit, ha ka sngi Thohdieng kum ka dak ban burom ïa ki bor synshar jong ka East bad West Jaiñtia ki la rai ban sangeh shwa ïa ka jingïakhih ba khlem pud sngi kaba la sdang naduh ka 6 tarik mynta u bnai.
Ka jingpynsangeh ïa ka jingïakhih ka long halor ka jingkular jong ki bor District hadien ka jingkhot ïakynduh ïa ki nongïalam ka MCTODA ha Khliehriat da kaba pan por hapoh 10 ban pynbeit bad ki trai jong ki Kharkhana Cook kiba don hapoh ka rilum Jaiñtia.
Shuh shuh katkum ka jingdawa ki nongñiah bad ki trai trok ka long ban pynkiew ïa ka bai kit jong ki na ka T. 1400 sha ka T. 2500 shiton, hynrei ïa kane ka dor ka dang ïaid mynta hapdeng ka jingïakren bad ki trai Coke la ki lah neem ban siew ïa ka dor. Katba ïa ka rukom pynkit ïa u coke la rai ban ïaid noh salonsar da u laiñ khnang ban ïoh jingmyntoi ïa baroh.
U President ka MCTODA Jaiñtia Unit Bah Heibormi Pariat, u ong kane ka jingsangeh shwa shipor ïa ka jingïakhih ka long shi bynta ban ap ïa ka rai ba khadduh la ka long kaba seisoh neem hynrei lada kim ïoh katkum ka jingdawa kim banse ban pynlong biang ïa ka jingïakhih kaba tyngeh.
Ïa kane ki la shim lang ïa ka rai ha ka jingïalang ba la long ha Mawryngkneng ha ryngkat ki nongïalam jong ka MCTODA, Central Boby.
