Shillong, Jymmang, 09: Ka Iingbishar Meghalaya High Court ha ka sngi Thohdieng ka la ailad ïa ka Sorkar Jylla ban ïaid shakhmat ban shna ïa ki kamra klas na ka bynta ka Shillong Medical College bad la bthah ban burom ïa ka jingïateh kular ha kaba ïadei bad ka jingshimti ïa ka building na kaba ka Suraksha Diagnostic Centre (SDC) ka treikam mynta ha Pasteur Hill, Shillong.
Ka Bench kaba kynthup ïa u Chief Justice IP Mukerj bad u Justice W Diengdoh ha ka hukum ka la ong, “ka Jylla ba shah mudui ka lah ban ïaid shakhmat ban shna ïa ki kamra klas ha Block -B, C bad D hynrei kano kano ka jingtei kan long kaba pyrkhing bha bad kaba lah ban weng noh lada jia ba u nongmudui u jop. Ki jingïateh kular ban ban shimti ïa baroh saw tylli ki block yn pynneh da ki ar mamla tad haduh ban da pynmih da kiwei pat ki hukum.”
U Ophisar ba kyrpang ba la thung da ka ïingbishar ha ka 25 tarik Ïaiong, 2025 u la leit jngoh ïa ka jaka (Block -A), u la leh ïa ka jingtohkit bad jingshim jingkheiñ ïa ki mar kiba don hangta bad u la aiti ïa ka kaiphod ha kane ka iingbishar.
Katkum kane, ka Iingbishar ka la bthah ïa u Ophisar ba kyrpang ban pynphriang ïa ka kopi jong ka kaiphod jong u sha baroh ki ar mamla hapoh ka 12 tarik, Jymmang.
Katkum ka jingong jong u Saha, u Senior Advocate uba mihkhmat na ka bynta u nongmudui katkum ka jingïateh hapdeng u briew jong u bad nongshah mudui ym tang ïa ka Block-A hynrei ïa ki Block-B, C bad D ruh la ai sha u briew jong u ban pynïaid ïa ka kam. Ka phang jong ka jingbishar ka kynthup ïa ki Block-B, C bad D nalor ka Block-A.
U Advocate General u la pynpaw ba ki tiar jong u nongmudui ki don ha Block-A bad ki Block-B, C bad D ki long kiba thylli beit.
Ka nongujor jong u mynta u pyndonkam ïa kita ki Block ban shna ïa ki kamra klas na ka bynta ki samla pule jong ka Medical College kaba don marjan.
U ong ba ïa kita ki unit ym shym la ai sha ki bynta bad ki ju don ha ka kti jong ka Jylla ba la shah mudui. Ïa kane la kyntait biang da u Saha, uba pynskhem ba hapoh katei ka jingïateh la aiti lut ïa ki Block sha u nongujor jong u bad ba kine ki lai tylli ki Block-B, C bad D ki leit jia ryngkhat ba ki long kiba thylli.
Ka jingkylli ka hap ban leit la ka long ha ka aplikeshon jong ka Section 9 ne ha ka jingbishar hapdeng ki arliang mamla. “Ha kum kita ki khep, ngi bthah ïa u Ophisar ba kyrpang uba ladep thung ba un shim ïa ka dak jong ki Block -A, B, C bad D . Ngi khanglad ruh ïa ki arliang mamla ban kam trai ha kaba ïadei bad kito ki jaka,” ong ka ïingbishar kaba la bthah shuh shuh ïa u Ophisar ba kyrpang ban ai sa kawei pat ka kaiphod ban sam sha ki arliang mama, kaba pyni ïa ka jingbud ïa kane ka hukum, shwa ban wan phai biang ha ka tarik ba la buh.
