Urkaliar Ground, Naitung 09: Ka lympung ïalehkai phutbol kaba la tip da ka Samkhamti Summer Cup na bynta kito ki khynnah ba dang hapoh ka 20 snem ka rta la pynhap pyrda noh hynnin ka Sngi Saitjaiñ jong ka taïew ba ladep (08 naitung), ha kaba ïa ka namlahduh la ïoh ban rah da ka kynhun lehkai Aiba FC.
ïa kane ka lympung la ïoh ban plie pyrda naduh ka 04 tarik u Jylliew bad ki la don haduh 22 tylli ki kynhun kiba la wan ban ïashimbynta bad ha kaba khadduh dei satang ka Ibarial FT Center bad ka Aiba Fc kiba la ïoh ban bteng ïa ka lynti ïaid shaduh ka final.
La ïoh ban khylliap ïa kane ka lympung ha ka jingïadon ryngkat i Bah Samborlang Diengdoh bad ruh i kurim jong i, i Kong Khamtilin Massar.
Hashwa ban sdang ïa ka jingïalehkai, na ka liang jong i Bah Samborlang Diengdoh i la ïoh ban kren ai khublei ïa baroh ar kynhun ki ban sa aireng kawei ïa kawei bad kumba la leh ha ka sngi plie pyrda ïa ka lympung ha kane ka sngi ruh la ïoh ruh ban pule ïa ki kyndon bad ki ktien smai (rules & pledge), kiba la buh ryntih da ka seng na ka bynta ki player.
Haba phai sha ka jingïalehkai ym shym la don ba pynkhihjar haduh kaba kut jong ka 90 kaba la pynlong ïa kine ki ar kynhun ban jam sha ka extra time.
Dei ha ka wat kaba ar jong ka extra time ba ka Ibarial FTC ka la ïoh ban lamkhmat ïa ka jingïalehkai lyngba ka shi kol kaba la thep da u Biangki Khongjoh. Watla ka por ka lyngkot na ka bynta ka Aiba fC hynrei kam shym la kynrandien satia bad ha ka jingbym poi pyrkhat ki bak ka Ibarial u Marshal Nongtnger jong ka Aiba u la pynkhie im biang ïa ka jingïalehkai da kaba pynïakhaid shuwa ban sa kut ka minit lehkai jong ka extra time.
Katei ka shi kol na u Marshal Nongtnger kaba la pynïakhaid ïa ka jingïalehkai da mar 1 kol haduh ka extra time ka la ai mynsiem ïa ka kynhun. Dei hangne ba ka Aiba FC ka la ïoh ban pynliem ïa ka Ibarial 5- 3 kol ha ka jingïashut ïa ka tie breaker ban rah ïa ka namlahduh.
