Shillong, Rymphang 23: Ban pynpaw ïa ka jingangnud na ka bynta ka bha ka miat jong ki shnong kiba don ha ki thaiñ khappud, ki shipai BSF ka 4th Bn Meghalaya ki la pynlong ïa ki prokram ïarap paidbah ne ka Civic Action Programme bad kumjuh ruh ka jingpynlong ïa ka jingai jingsumar ei ha Dawki bad ha shnong Muktapur kaba ha West Jaiñtia Hills district ka Meghalaya.
Kane ka jingsdang ka thmu ban kyntiew ïa ka bha ka miat jong ki nongshong shnong kiba sah ha shilynter u pud u sam ka India Bangladesh da kaba ai ïa ki tiar kiba kongsan bad ki jingai jingsuma bad ki dawai.
Ha ka prokram ki shipai BSF Meghalaya ki la sam ïa ki dawai bad ki tiar kiba kongsan sha ki nongshong shnong kiba tlot ka ïoh ka kot napoh ki thaiñ khappud ba kynthup ïa ka shnong Dawki, Bakur, Riahjalong, Lakroh, Hawai Sutnga, Hartoli, Muktapur, bad Hawai Bhoi. Palat 250 ngut ki nongshong shnong na kine ki thaiñ ki la ïoh kine ki jingmyntoi ha ka Civic Action Programme bad medical camp.
Kum shibynta na kane ka prokram, la sam ïa ki tiar bam, ki tiar ïalehkai, ki pla skul, bad ki water tank ha kaba la sam sha ki samla pule jong ki skul bapher bapher kiba don ha kine ki thaiñ. Kum ban bynrap la sam ruh ïa ki dawai sha ki nongshong shnong kiba donkam ha kane ka medical camp, ban pynthikna ba kin ïoh ki jingsumar kiba kongsan.
Kane ka jingsdang ka pynpaw ïa ka jingangnud bad jingaiti jong ki shipai BSF ban shakri ïa ki nongshong shnong basah ha ki thaiñ khappud bad ban don ka jingïadei kaba ïajan bad ki nongïalam shnong. La ong ba ki BSF ki aiti ruh ban ïada ïa u pud u sam ka ri, ha kajuh ka por ban sam ïa ki kam pynroi sha ki paidbah kiba sah sha kiba kyndong eh ka ri.
