Nongstoiñ, Jylliew 19: Kum shibynta ban pynshlur bad ai mynsiem ïa ki nongrep ba kin trei shitom ban kyntiew arshah ïa ka ïoh ka kot lyngba ka kam rep ka ophis jong ki, ka Krishi Vigyan Kendra West Khasi Hills ka la pynlong ïa ka prokram ba kyrpang ha Nongshilong, na ka bynta ban pynshai bad pynsgewthuh ïa ki nongrep, kumno ban kyntiew arshah ïa ka ïoh ka kot lyngba ka kam rep kam riang jong ki lane ka Doubling Farmers Income.
Ha kane ka sngi la wan ban ïashimbynta da ki phew ngut ki nongrep na West bad Eastern West Khasi Hills, ha kaba u Saikat Sinha senior Scientsit u ba dei u khlieh duh jong ka KVK West Khasi Hills, u la ïadon lang bad u la ai ruh ka jingpynshai sha ki paitbah nongrep, kumno ba kin pynkhlaiñ ïa ka rep ka riang, namar ka kam rep ka dei ka kam kaba kongsan tam ha ka jingim ba man la ka sngi.
Utei u saïantist u la ong ruh ba kano kano ka jylla lane ka ri ha ka pyrthei kaba lah ban kyniew ïa ka rep ka riang, ka dei ka ri kaba kiew ha ka ïoh ka kot bad ka ri kaba riewspah. Hynrei lada ki ri ne ki jylla ki hiar ha ka rep ka riang kita ki jylla ki dei ki jylla kiba duna bha ha ka ïoh ka kot.
U bah J.Sohshang sordar jong ka shnong Belkhariang uwei na ki nongrep u ba la paw bha u la long u kongsan. Haba ai jingkren ha katei ka sngi kum u kongsan u la ong ba ka thong jong ki nongrep haba ki trei shitom, ka long ban kyntiew ïa ka ïoh ka kot ka kamai kajih na ka kam rep.
U la ong ruh ba naduh ka ophis jong ka KVK ka la ju ai jingïarap man la ka por sha ki paitbah nongrep, ban ai ki jinghikai kumno ban rep bad kiei ki rukom rep kiba lah ban pynmih khambun lada ki nongrep ki pyndonkam.
La ïoh ruh ïa ka jingkren na ki katto katne ngut ki nongrep kiba la pynïasoh bad ka KVK naduh u snem 2018 haduh 2022.
Kum ka dak jong ka jingpynkup burom, la sam ïa ki syrnod sha ki nongrep kiba la wan ban ïashim bynta bad la sam ruh ïa ki symbai jong ki mar rep bad ki tynrai dieng soh.
