Nongpoh, Jylliew 19: U MLA ka Nongpoh Constituency u Bah Mayral Born Syiem kum u kongsan mynta ka sngi u la leit ban plie paidbah ïa ka building skul jong ka Umjari Govt. LP School kaba la ioh ban shna lyngba ka skhim pynroi na ka sorkar Meghalaya.
Ha kane ka sngi u la ioh ruh ban plie ïa ka Painkhana bad ka madan phutbol ba la mang tyngka lyngba ka skhim SRWP jong u snem 2022-2023 kaba don ha ka shnog Umjari ha Ri Bhoi.
Ha kane ka jingplie paidbah ïa kine ki kam pynroi la sakhi lang ruh da ka jingdon lang u Bah R. Rizal SDSEO Ri Bhoi District, kum u symbud kongsan, u P. P Yadav Block Mission Coordinator Umling Block, u Bah Kyrshan Sulein Rangbah Shnong, Tbn. ED Khymdeit, Babu S. W Langi Secretary jong ka Managing Committee Umjari Mathan Govt. LP School, ki nonghikai, ki khynnah Skul,ki kmie ki kpa ki khynnah Skul, ki paitbah nongshong shnong ka Umjari lem bad kiwei.
Lyngba jong kane ka sngi, ka Managing Committee jong ka Umjari Mathan School ki lah pynsngew ïa ka jingkwah jong ki lyngba ka dorkhas hakhmat u nongmihkhmat bad ki ophisar ka tnad Education ïa ka jingdonkam kum ka Mid-day Meal scheme, ki Painkhana, ki kitchen shed, ka kynroh na ka bynta ka jingbit jingbiang jong ka skul.
U Bah Mayral Born Syiem, MLA ka Nongpoh Constituency u lah pynpaw ïa ka jingsngew kmen ïa ka jing ioh ban plie ïa kane ka skul building ba thymmai, nangta ka Madan Phutbol bad ruh ïa ka jingioh ban plie ïa ka public toilet jong ka shnong Umjari.
Shuh shuh, u lah kyrpad ïa ki paitbah nongshong shnong jong ka Umjari Mathan ba kin ïaishah bad u kum u MLA ba un ïai buddien ban pynioh ïa ka jingdonkam jong ka Skul bad ruh ïa ka jingdonkam ha shnong ha thaw halor ka dorkhas kaba lah buh.
Na ka liang u Bah R. Rizal SDSEO Ri Bhoi District u lah kular ba yn sa pynioh ïa ka jingdonkam jong ka Skul watla ka long ka lynti kaba jngai hynrei kin thaw ka lad ka lynti ban pynioh ïa ki jingdonkam jong ka Skul building ba thymmai.
La pynkut ruh ïa kine ki jingplie ïa kitei ki kam pynroi da kaba la ioh ruh ban sakhi ïa ka jingshad ka ba lah ïa shim bynta da ki khynnah Skul ka Umjari Mathan Govt. LP School, Umjari Pres UP School bad ruh ka jingshad na ki V. O Umjari.
