Shillong, Naitung 04 : U MDC ka Tura ba dei ruh u Vice President ka BJP, u Bernard Marak ryngkat ki dkhot ka BJP ki la leit ban sam da ki marbam sha ki kynhun bapher bapher kiba don ha Tura.
Katei ka kynhun jong ka BJP ka la leit ban sam marbam sha ka Mother Teresa Charity Home, leper colony bad ruh sha ka TB Hospital ha ka janmiet sngi Saitjain. Nalorkata, ki la pynsngap ïa shibun ki jingeh kiba kum ki iing ki sem ki kynduh ha leper colony.
Nalorkata, ki la bishar bniah ruh ïa ka report kut snem jong ka TB Hospital bad ka kynhun ka la rai ruh ban ai jingïarap sha ka leper colony namar bun na ki, kim ïoh satia ïa ki song jingïarap na ka sorkar.
Na ka liang u MDC u la kular ruh ban ïarap katto katne ngut ki nongpang TB hapoh ka Nikshay Mitra. Katkum ka jingong jong u, ha kine ki khyndai snem ka sorkar u Modi ki la don shibun ki jingkylla bad kumta na ka liang ka BJP ka pyntikna ba kan ymdon kano kano ka jingeh ban ai jingïarap ïa ki paidbah.
