Ka UCC kan wanrah ïa ka jingïatylli, ka jingpynslem pyntreikam kan ktah ïa ka jingngeit tynrai: VP

Shillong, Naitung 04 (PIB): U Vice President jong ka ri India, u Jagdeep Dhankar mynta ka sngi u la ong ba ka Uniform Civil Code (UCC) kan wanrah ka jingïatylli bad ka jingieid ha ka ri bad ka jingpynslem ban pyntreikam ïa ka kan ktah ïa ki jingngeit tynrai jong ki paid ka ri.
Haba kren ha ka jingpynkup burom ba 25 jong ka IIT Guwahati mynta ka sngi, u Vice President u la ong ba ki Directive Principles of State Policy (DPSP) ki long kiba ‘kongsan ha ka jingpynïaid ia ka ri’ bad ba ka dei ka kamram jong ka Sorkar ban pynkylla ïa kine sha ki kyndon. U la ong ba bun na ki DPSP kum ki Panchayat, Cooperatives & Right to Education ki dei kiba la pynkylla sha ki aiñ, bad u la ong ba ka la dei ka por ban pyntreikam ïa ka Article 44 jong ka Riti Synshar.
U la ong ruh ba kadei ban don ka jinghusiar na ki jingpyrshang ban ktah ïa ka burom jong ka India bad ‘ki jingwanrah ïa ki khana thok na ka por sha ka por shaphang ka India. U la ong ba ka por ka la dei, ba ai jubab kaba biang ïa kiba pynsaphariang ïa ki khana pyrshah ïa ka India.
Shuh shuh u Jagdeep, u la ong ruh ba ym dei ban don kano kano ka bor nabar ri kaba la ailad ban ktah ïa ka jinglong trai bad ka burom jong ka ri. U la ong ba ka India ka dei ka ri synshar paidbah kaba rim, ba ïar bad kaba treikam bha naduh mynshuwa. “Ngim dei ban shah ïa kano kano ka jingktah ïa ka Synshar paidbah jong ngi bad ki kynhun kiba don hapoh ka Riti Synshar,” u la ong.
Haba kre n halor ka jingbamsap haka ri, u VP, u la ong ba ym dei satia ban don kano kano ka jingmap ïa kiba bamsap. “Ka jingbamsap ka long pyrshah ïa ka jingsynshar paidbah bad ka dei ka jingai jingshakri ka Sorkar bym biang, ka jingbam sap ka ktah ruh ïa ka roi ka par . U Dhankhar u la ong ruh ba um sngewtynnad ba katto katne ngut ki briew ki ïakhih ha ka jaka ban ïaid katkum ka aiñ, haba ki shah kem namar ka jingbamsap.
U Vice-President u la kyntu ruh ia ki samla ba kin sngew sarong ïa ki jingjop jong ka India. U la ong ruh ba ki dei ban long kiba trei na ka bynta ka ïoh ka kot jong ka ri bad ba ki dei ban kiar na ki rukom ïohnong kiba ktah ia ka ri.
U Lat ka jylla Assam, u Gulab Chand Kataria, u Myntri Rangbah ka Assam, u Dr. Himanta Biswa Sarma, u Chairman Board of Governors, IIT Guwahati, Dr. Rajeev Modi, Director IIT Guwahati, Prof. Parameswar K. Iyer, ki nonghikai bad ki samla pule ha ryngkat kiwei kiwei ki heh ki haiñ ki la ïadon lang ha kane ka sngi.