Shillong, Naitung 04 : Ka kynhun jong ki nonghikai Upper Primary hapoh ka lama jong ka Meghalaya Upper Primary School Association (MUPSTA) hynne ka sngi ki la kynduh ïa u Myntri ka tnad Pule Puthi ka sorkar jylla, Rakkam A Sangma ban phah tuklar halor ka jingdawa ban kyntiew kyrdan noh ïa ki 844 tylli ki skul Upper Primary sha ka kyrdan Deficit.
Haba kren bad ki lad pathai khubor, u President ka MUPSTA, Bah Kenneth Shadap u la pyntip ba ha ka jingïalang bad u Myntri ka long ban buddien ïa ka jingtyrwa ban kyntiew kyrdan noh ïa kitei ki skul adhoc upper primary sha ka kyrdan deficit.
“Ka sorkar MDA ba la dep ka la phah ka jingtyrwa na ki 844 tylli ki adhoc upper primary school na bynta ban kyntiew kyrdan noh sha ka deficit system katkum ka office order memo No. EDN/172/2006/69 Dated Shillong the 7th February/2019 and DSEL/EL/GB/Misc/16/2010/Pt.1/221dated 18.03.2019 bad kumta, ngi la ïakren ïa kane ka ishu bad u Myntri ban pan ka jingïarap lem jong u,” ong u Bah Kenneth.
Utei u nongïalam ka kynhun u la pyntip ruh ba ka tulop ba ki nonghikai adhoc mynta ki ïoh ka long kaba rit bha na bynta ban pyndap ïa ka jingdonkam ha iing ha sem bad bun na ki, kim lah satia ban phah ïa ki khun jong ki sha ki jingpule kiba kham heh.
U la ïathuh ruh ba mynta la kumba arphew snem ba ïa ka non-recurring grant-in-aid khlem ai shuh sha ki skul adhoc katba kiwei kiwei ki jingdonkam kum ka grant ban pynbha ïa ki skul, ka jingai uniform ei na bynta ki khynnah bad kiwei kiwei la ïoh da ki skul SSA.
“Ngi kyntu ïa u Myntri ba un peit halor kane ka jingtyrwa ban kyntiew kyrdan sha ka deficit ban pyntreikam ïa ka jingmut kajuh ka jingsiew na bynta kajuh ka kam,” u la ong.
U Bah Kenneth u la pyntip ruh ba ha ka jingïalang ki la pyntip sha u Myntri ba ki nonghikai adhoc ki la kynduh bun ki jingeh haba ïadei ban pyndap ïa ki kam ba thylli na ka daw ka jingkhlad ne ka jingshongthait noh ki nonghikai na ka daw ka jingbuh kyndon ban pass MTET na bynta ki skul adhoc.
“Ki don ruh ki skul adhoc kiba khlem pat ïoh ban thung nonghikai thymmai la kumba shisnem ban pyndap ïa ki kam ba thylli na kane ka daw namar ym don ki nonghikai ba pass MTET kiba aplai. Ki don bun ki nonghikai kiba la tbit hynrei kiba khlem pat don MTET. Kumta, ngi kyrpad ïa u Myntri ba un shimkhia ïa kane ka bynta ruh bad pynjynsur ïa ki kyndon na bynta ki skul Adhoc ban thung ïa ki nonghikai ba khem pat pyndep MTET,” u la ong.
