Shillong, Lber 17 : Ki la don palat 1060 tylli ki Utilization Certificate (UC) kiba la kot sh aka 7,460.84 klur tyngka kiba dang sahteng tad haduh ka 31tarik Lber, 2024.
Na kine, 2,624.91 klur tyngka kiba ïadei bad ki 327 tylli ki UC la dep ban pynkhuid, pynpaw ka kaiphod comptroller and auditor general of India (CAG) ha ka kaiphod jong u snem 2023-24.
Ka jingdon ki UC kiba dang sahteng haduh ka 31tarik Lber, 2024 ki long 733 tylli kiba kot sha ka 4,835.93 klur tyngka. Haduh u snem 2022 -23 ki don 333 tylli ki UC kiba dang sahteng kiba kot sha ka 2,261.91 klur tyngka. Bad ha u 2023-24 ki don 400 tylli kiba kot sha ka 2,574.02 klur tyngka da kaba bynrap ruh ba ka jingdon ki UC kiba la phah ha shwa ka por ba la buh ka long 122 tylli kaba kot sha ka 424.77 klur tyngka ha u snem 2023-24.
Kine ki UC kiba dang sahkut ki kynthup ïaki 96 tylli kiba kot sha ka 1,921.54 klur tyngka kiba dei na ka skim jong ka sorkar pdeng ne kita ki centrally sponsored schemes (CSS).
La ong ruh ba katkum ka Rules 515 jong ka Meghalaya financial Rules, 1981, ki Utilization Certificate (UCs) kiba ïadei bad ki Grants-in-Aid, ki nongïoh ki dei ban phah sha ki bor ba dei ha ka por la buh. Nangta la ong ruh ba ka jingbym phah ïa ki UC ka buh ruh ha ka jingma ba ka pisa kaba la kdew ha ka finance account ka lah ban ym poi sha ki nongïoh jingmyntoi, ong ka kaiphod CAG.
