Shillong, Lber 18: U nongïalam ka BJP bad u Myntri ka sorkar jylla u Bah AL Hek ha ka sngi baar u la ong ba ka jingtyrwa ban wanrah ïa ka projek rel ha Khasi bad Jaiñtia Hills ka dei ban long halor ka nongrim jong ka jingkwah ki paidbah.
Haba kren sha ki lad pathai khubor halor kane ka kam, u Bah Hek u la ong, “Kata ka dei ka jingkwah jong ki paidbah. Lada ki paidbah ki kwah ïa ka rel, dei ban wanrah ïa ka rel bad lada ki paidbah kim kwah kumta ym dei ban wanrah ïa ka. Ka shong ha ka jingkwah jong ki paidbah.”
Kane ka jingkren jong u, ka la wan kum ka jingkynthoh ïa ka jingpyrshah kaba jur jong ki sengbhalang pyrshah ïa ka jingthmu jong ka sorkar ban wanrah ïa ka railway line ha East Jaiñtia Hills District.
Haba kylli, u Bah Hek u la ong, “Nga kwah ban ïathuh ïa phi ba kane kadei na ka bynta ka jingbha ka jylla Meghalaya ym ïa ka party. Ngi kwah ban ïohi tang ba ka dei ban long ka jingmyntoi jong ki paidbah ka Meghalaya.”
Halor ka jingbym lah jong ka party ban leh bha ïa ka elekshon ADC, u nongïalam ka BJP u la ong ba kane ka dei ka jingjied jong ki paidbah.
“Ngi la pynïeng ïa ki kyrtong jong ngi hynrei ki khlem poi sha ka thong namar kadei ka jingjied jong ki paidbah, kumno ngin lah ban ïathuh la ki paidbah ki la thep vote ne khlem vote na ka bynta ka party, ngam lah ban ong eiei namar kadei ka jingjied jong ki.”
Halor ka jingpulom ka BJP ban lah ban paw ha ka saiñ pyrthei ha ka jylla, u Bah Hek u la ong, “Haba peit ïa ka jingtreikam u Myntri Rangbah duh ka ri u treikam, bad ka BJP ka treikam hapoh ka sorkar pdeng, ki paidbah kin sa sngewthuh shisien ka sngi. Lada ym dei mynta ha kawei ka sngi kin sa sngewthuh.”
Haba ïadei bad ka jingjur ka dheng kali Shillong, u la ong, “Kane ka la long ka jingeh ïa baroh ki paidbah hynrei ka sorkar ka la pyrshang katba lah halor kane.”
“Kumba phi la ïohi ba ka jingpynheh ïa ki surok ha Shillong ka long kaba eh bha kumta katba don ki lad, naba ki kali ruh ki la nang bun kiba ïaid ha surok manla ka sngi. Ngi hap ban wad ki lad kiba bha naba ka sorkar kan sa pynkynriah ïa ki ophis sha New Shillong. Kane kan ïarap ban pynduna ïa ka dheng kali. Kadei kawei ka rai kaba bha tam ba la shim da ka sorkar,” u la ong.
