Shillong, Jymmang 15: Kiba bun ki project bala tyrwa ban pynkylluid ïa ka Nongbah Shillong kila shu sahkut bad sahteng namar ka jingbym lah ban ïoh jaka ka dei kawei na ki mawsiang bala iatyngkhuh da ka Sorkar Jylla.
U Symbud Myntri Rangbah ka Jylla ba khmih ïa ka Tnad Public Works Department (Roads) Bah Prestone Tynsong ula pyntip ba ka Tnad kala dep ban ithuh ïa ki katto katne ki jaka ban shna ïa ki surok ba syriem kum ki bypass hapoh Shillong haba khmih ïa ka jinglong jong ki surok ba mynta kiba ïai neh sah kumjuh katba ka jingdon ki kali kala nang bun na ka sngi sha ka sngi.
U Bah Prestone u pyntip ba kawei na kine ki jaka bala ïathuh ka dei ka junction ha Anjalee Petrol Pump hynrei kane ka jaka ka hap hapoh ka jingkhmih jong ki bor shipai.
“Ngi la dep kyrpad ïa ki bor shipai ba kin ai ha ngi ïa kane ka jaka ba ngin ïoh shna ïa ki intermediate lane ka ban pynlong kum ka surok oneway ka ban pyllait ïa phi ban ïaid lyngba ka Anjalee Petrol Pump hynrei ban ïaid lait beit beit sha ka lynti Sohra ne Pynursla” ula ïathuh.
“Ngi la ithuh ïa ka Anjalee Petrol Pump namar kane ka jaka ka dei ka bym lah satia ban weng ïa ka jingdheng kali. Namar kata, lada ngi ïoh ïa ka jaka, ngi sa sdang noh mardor ban shna ïa ka bypass” ula bynrap.
Haba pynpaw ba ka Tnad kala pyrshang ruh ban pyntrei ïa kum kine ki project sha kiwei pat ki jaka, u Symbud Myntri Rangbah ula ong “Kaba sngewsih ka long ba ngi shem jingeh ban ïoh jaka”.
“Ym don satia kiba kloi ban ai jaka watla ngi la kyrpad ïa ki lehse da ka jingsiew lane da kaba shu thied. Kumba phi tip ba ka jinglong jingman ha Shillong, watla 2 ne 3 phut ka jaka ka dei kaba kordor ïa ki trai jaka” ula ong.
Ha ka 12 tarik Jymmang, ka Ïingkashari Meghalaya High Court kala bthah ïa ka Sorkar Jylla ban wanrah ïa ki plan ba shipor bad ba shirta kumno ban pynkylla ïa ka jingdheng kali ha Shillong.
U Bah Prestone ula ong ba ka kam ban weng ïa ka jingeh jong ka jingdheng kali ha Shillong kan dei ka kam kaba jwat bha ïa ka Sorkar Jylla. “Kane ka jingeh hi kam dei ka kam kaba lah ban pynbeit tang shimiet hynrei ngi la pyrshang kat kaba lah ban leh eiei” ula ong.
“Ka jingeh hi ka dei ba phim ïoh jaka. Watla phi kloi ban siew lai shah ïa ka dor iew, ki trai jaka kim kwah satia ban ai. Lada ki trai jaka kim ai jaka, baroh kiei kiei ki shu kut noh namar kat kum ka rukom bat khyndew hangne, ki riew shimet ki dei kiba long trai ïa ki jaka puta” ula bynrap.
Kat kum ka jingkheiñ ba lum da ka Sorkar Jylla, palat ïa ka 70% ki Longïing ha Shillong ki don la kumno kumno ruh ïa kawei ka kali bad na ka jinglong jingman jong ki jaka hangne bad jingdon bun ki kali, ka jingdheng kali ka dei ka bym lah satia ban lait.
Halor ki jingai jingmut jong ki riewshemphang ban shna noh da ki ropeway ban pyndonkam ha ka leit ka wan ym tang ban buh ïa ki nongshangkai, u Bah Prestone ula ong “Kane ka plan kala don. Ngi la dep phah ïa ka Detailed Pro ject Report bala pynkhreh da ka Tnad Planning”.
Ha kajuh ka por, u Bah Prestone u pyntip ba ka Tnad Pule Puthi kala dep shong jingïalang bad ki Principal jong ki jaka pule bapher bapher ka Nongbah Shillong ban ïakren halor ka jingthmu jong ka Sorkar ban ai school bus ha kaban leit shaw ne leit buh ïa ki khynnah pule na la ki jong ki shnong ki thaw. U ong ba kane ka dei kawei ka lynti ban weng ïa ka jingkhapngiah ka nongbah Shillong.
