Nongstoiñ, Naiwieng 03: Hadien ka jingpynbna jong ka sorkar MDA ba ka la pynkha ïa ka Rambrai C&RD Block, ki paitbah jong ka thaiñ ki la kyrmen ba kin sa ïoh shibun ki jingmyntoi, hynrei ka la wanrah pynban ïa ka jingeh namar ka jingbym pat treikam thikna jong katei ka Block.
Halor kane, u bah Jiedstarland Lyngkhoi president ka FKJGP Rambrai circle haba ïakren bad u nongthoh khubor u la ong ba naduh ba la pynkha ïa katei ka Block, ka jingpyntrei ïa ki skhim bapher bapher ha kylleng ki shnong jong ka thaiñ, kam shym la ïaid beit shuh namar ka jingbym don jong ki nongtrei ha ka ophis.
U la ong ruh ba la ar sien ar wat ki nongïalam ka seng ki la leit sha katei ka ophis ban leit ïakynduh ïa u Block Development Officer bad ki nongtrei, na ka bynta ban ïaphylliew jingmut kumno ban pyntreikam ïa ki kam pynroi ha ka thaiñ kiba ka sorkar ka la bynshet lyngba ka Block ophis, hynrei ym don briew bad ki la hap ban wanphai tylli.
Utei u nongïalam ka seng u la ong ruh ba man ka por ki paitbah ki la wan ban pyntip sha ka seng ba ki don kam shibun ki jingïarap, khamtam eh ha kaba pyntrei ïa ka skhim shispah sngi namar ba naduh ba la plie ïa katei ka Block ym ju kham ïoh shuh ba pyntrei ïa katei ka skhim.
U la ong ba ha ki snem ba mynshuwa ba ym pat plie ïa ka Block ha Rambrai, ki paitbah ki don ïa ki kam ba dei ban peit da ka Block ophis ki leit beit sha Nongstoiñ. Hynrei ha kine ki snem pat lada leit sha Nongstoiñ la shah khynñiat pynban ba ïa ki kam jong ki dei ban pynbeit ha Rambari Block, katba na Rambrai pat ym don kiba peit ba khmih lane ki ban ïarap ban pynbeit ïa ki kam ba ki paitbah ki donkam.
Kumta halor kitei ki jingeh ba ki paitbah ki ïakynduh, na ka liang ka seng ka dap da ka jingsngewkhia bad ka kyntu jur ïa ka sorkar ba ka dei ban pynbiang noh ïa ki nongtrei ha Rambrai Block, kata naduh u Block Development Officer ki staff bad baroh ki nongtrei kiba dei ban don ha katei ka ophis.
Ym tang katta hynrei na ka liang ka seng ka la kyntu ruh ïa ka sorkar, ba kan pynkloi noh ban mang pisa na ka bynta ban tei ïa ka ophis ba pura bad ban pynthikna ruh ïa ka jaka na ki trai khyndew kiba kwah ban ai jaka ban shna ïa katei ka Block ophis, khnang ba ki paitbah kin lait na kiba bun ki jingeh bad ba kin ïa ïoh lang ïa ki kam pynroi kumba ïoh lem ki para nongshong shnong kiba hap ha kiwei pat ki Block.
