Nongstoiñ, Jymmang, 30: Ka Hynñiewtrep Youth Council West Khasi Hills District ka la pynpaw ïa ka jingsngewkhia ïa ka jingsahkut kali ha Wahlyngdoh lynti Maweit mynta ka sngi, ha kaba ka Subway ha Wahlyngdoh ka la twa naduh 1 baje haduh 5 baje na ka daw ka jingtwa bad shah rat umsaw jong ka Subway kaba la ktah ka leit ka wan ki paidbah baroh shi sngi haduh da miet.
U Samla Lumlang Kharsyiemlieh President HYC West Khasi Hills District u la ther tyngeh ïa u Manager jong ka Company da kaba kynthoh ba imat ka company shna surok kam don mynsiem pyrkhat ïa ki paidbah ka thaiñ Maweit haduh ban leh beiñ haduh katne.
U la ong ba kane ka jingleh ka dei ka bym lah satia ban pdiang, namar lah katno palat snem ym pyndep ban shna haduh ba ki nongleit nongwan ki sah kut na ka por sha ka por ka leit ka wan bad kane ka dei ka sien kaba lai hapoh jong u ne u bnai ba mynta.
Ka seng HYC ka dawa na u DC, EE PWD ban ïarap lem halor kane wat ban ym shu ailad ïa u Contractor ban leh suki, namar katkum ka jingtip ka seng ba na kane ka jingsahkut uwei u khunlung ba mih na Civil Hospital u la khlad ba la kit na Nongstoiñ u la sah kut lang ha kane ka surok.
Uwei na ki riew rangbah ka thaiñ Maweit u Bah N Shyrkon, u la ong kane baroh ka dei ka jingleh sting u Contractor, namar naduh mynno la ong halor kane ka jingeh hynrei ym don ba patiaw.
