Sahdien ka Sohra Constituency ha baroh ki liang, ym don CHC ne wat ka College: CEM KHADC
Shillong, Naiwieng 06 : U Chief Executive Member ka KHADC ba dei ruh u MDC ka Sohra, Bah Titos W Chyne ha ka sngi Saitjaiñ u la pynpaw ïa ka jingbynñiaw kaba khraw ban ïohi ba ka Sohra ka sahdien ha baroh ki liang bad ka kylla long ruh kawei na ki constituency ka bym pat don tang kawei ka College ne wat ïa ka jaka sumar kaba biang lane ka Community Health Centre.
Haba kren ïa kane ha ka jingïalang jong ka UDP Sohra circle kaba long ha Mawkdok, u Bah Titos u la ong ba u sngewkhia ruh halor ka jingshah ïalam bakla ki paidbah ka Sohra ha ka bor pisa ha ki khyndiat sngi tang na ka bynta ba kin leit ïa donlang ha ka ki jingïalang jong kiwei ki seng saiñ-hima.
“Namarba ki ïohi ba ka lyer UDP ka la beh kylleng kylleng kumta don kiba pyrshang ban ber bih da kumne kumtai ban ialam bakla ïa ki paidbah” u la ong da kaba bynrap da kaba kynthoh tyngeh ruh halor ka jingpyrshang thong pisa ha kane ka por kumba long ha u snem 2018.
Shuh shuh u ong ruh ba kum u MDC u ïohi ba kam don dak satia wat ban kyntiew kyrdan ïa ki PHC kiba don mynta watla u MLA ba mynta u don ha ka sorkar.
Halor ka pule puthi, u la ong, “Ka Sohra Constituency kam don wat tang kawei ka College ruh. Ka ïoh ka kot ka la hiar bha bad ktah ïa ki paidbah khamtam hadien ka khlam COVID-19 hynrei kam don ka jingphai khmat bad ki paidbah ki im ha ka sohsat nalor ki kyndon bapher bapher ka Sorkar kum ka jingkhang tih maw tih shyiap.”
U Bah Titos W Chyne, u la mih khmat ïa ka Sohra kum u MLA naduh u snem 2013 haduh u snem 2018 ha kaba u la shah rem noh ha u Bah Gavin Mylliem, MLA ba mynta ka Sohra na ka seng People’s Democratic Front (PDF).
Ym tang katta, u Bah Titos, uba dei ruh u President ka UDP Sohra Circle bad kumjuh jong ka UDP East Khasi Hills District bad u la mih khmat ïa ka Sohra kum u MDC hapdeng ki snem 2009-2014 bad shah jied biang pat ha u snem 2019.
Ha kane ka sngi la pyntikna ruh ïa ka kyrteng u Bah Titos kum u kyrtong MLA jong ka Sohra da u Dr Jemino Mawthoh, Secretary ka UDP ha ka jingïadonlang u Bah Allantry F Dkhar, Working President, ki riewrangbah ba kynthup ia Bah Droistar Khongsti, uba la ïakhun ïa ka elekshon MLA na Sohra da ka seng HSPDP ha u snem 2018 nalor kiwei kiwei.
Nalor ki nongkyrshan kiba la don lypa, la sakhi ïa ka jingwan kyrshan jong ki dkhot ba thymmai kiba wan na ki seng saiñ-hima kum ka PDF, AITC, Congre, BJP bad kiwei pat.