Shillong, Naitung 30: Da ki spah ngut ki samla pule kiba ïaleh ïa ka eksam NEEt na Jowai Centre ryngkat bad ki kmie ki kpa, ki don hapdeng ka jingsah umdum bad ka jingkhuslai kaba jur na ka bynta ka lawei ka jong ki bad khamtam na ka bynta ka jingpule kaba kham sha jrong jong ki.
Lah ban kdew hangne ba ka eksam NEET ka la la long ha ka 5 tarik u Jymmang mynta ka snem bad ha Jowai Centre bad Nongpoh, ka la mih ka kynrum kynram, naduh kaba sdang ha ka por ba sam ïa ki jingkylli. Ha katei ka sngi ki samla kim shym la ïoh ban thoh ïa ka eksam ha ka rukom kaba dei ne kaba ki kwah ban thoh namar ka jingmih ki kynrum kynram. Hynrei kaba la pynkhuslai eh ïa ki samla pule kadei ka jingbym ïoh ïa ka por kaba biang ban thoh ïa ka eksam.
Hadien ba ladep kane ka eksam ki samla pule bad ki kmie ki kpa ki la leit ban ujor sha ka Centre jong ka Eksam, kata ka St. Mary Mazzarello, Jowai. Na ka liang ki nongpynïaid jong ka Centre ki la pan da ka jingthoh na ki samla pule bad phah sha ka sorkar lyngba ka tnad education department halor kane ka jingeh ki samla.
Kane ka eksam ka la poi ruh shaduh ka Supreme Court jong ka ri India ha kaba ka National Testing Agency (NTA) kaba pynïaid ïa kane ka eksam ka la ïadon bynta.
Katkum ka jingïathuh ki bor pynïaid ka NTA la ong ba lada ki samla ki duh ban thoh eksam ha ka por kaba biang ne lada ki duh ka por ban thoh katkum ka por ba ka buh, ki Centre ki lah ban ai ka por nr pynjlan ia ka por eksam, khnang ba ki samla kin ïoh ban thoh pyndep ïa ka eksam.
Hynrei na ka liang ki kmie ki kpa ki la ujorba ka Jowai kam shym la long satia kumta, wat lada ha ïingbishar ki bor pynïaid ki la kam ba la ai por kaba biang ïa ki samla pule ban thoh ïa ka eksam.
Ki Samla pule bad ki kmie ki kpa ki la nang kyrmen ba lehse ka Jowai Centre namar ba ka la don ka kynrum kynram kin ïoh lad ban thoh eksam biang da kawei, kumba la leh ïa ka Tura. Phewse, kam shym la long kumta bad mynta ki samla pule kim tip kaei kaban jia ia kane ka eksam ba ki ladep thoh.
“Ngim tip shuh kaei kaba ngin leh. Ngi la leit sha ki bor sorkar, ngi la leit sha High Court hynrei mynta ngim ïoh jingshai eiei halor kane ka eksam”, la ong ki kmie ki kpa.
Ki la ong ruh ba ka por na ka bynta ka counseling ka la jan, hynrei kiba ha Jowai ki dang sah ha ka lyngngoh.
Kumta ki samla pule bad ki kmie ki kpa ki kyntu ïa ki bor sorkar ban ai ka jingshai ha kaba ïadei bad kane ka eksam na ka bynta ki Under Graduate.
