Sah ïing jah ka ïew ki nongrep ha Ampati bym shim khia ka tnad Horticulture bad GHADC

Shillong, Nailur 18 : Ka iew nongrep kaba don ha Ampati, South West Garo Hills ba la tip kum ka Integrated Farmer’s Market Complex (IFMC) ka la kylla iingjah mynta na ka daw ka jingbym lah jong ka tnad Horticulture kumjuh na ka Garo Hills Autonomous District Council (GHADC) ban pyntreikam ïa ka wat hadien 47 bnai ba la dep shna ïa ka.
Ïa kane la sei pyrthei da ka kaiphod Comptroller Auditor General of India (CAG) ha ka kaiphod kut snem kaba kut ha ka 31tarik Lber 2020 kaba la wanrah ha ka Dorbar Synrai da u Myntri Rangbah ka Jylla, Conrad K Sangma.
Lyngba ka Special Plan Assistance (SPA) 2010-11, ka Planning Commission, jong ka sorkar India ka la mynjur ban tei ïa katei ka iew nongrep Ampati ha ka jinglut kaba kot sha ka 18 klur tyngka ha ka bhah kaba long 90:10 persen hapdeng ka sorkar pdeng bad sorkar jylla. Ïa ka jingtei, ka tnad Horticulture ka la aiti ha ka Meghalaya Government Construction Corporation Ltd (MGCCL) ban pyntrei kaba hadien ba la dep khot tender ïa ka kam la ïoh da ka M/s Srinath Builders & Housing Co (P) Ltd, Guwahati.
Namarba katei ka jaka ba tei kadei jong ka Garo Hills Autonomous District Council (GHADC), kumta ïa ka memorandum of understanding (MoU) la ïa soi ha ka 30tarik Jymmang, 2013 hapdeng ka GHADC bad ka sorkar Meghalaya.
Katei ka jingtei kaba la don haduh 389 tylli ki dukan kynthup noh ïa ki jingtei ba shu tap bad ka painkhana la pyndep ha u Kyllalyngkot 2018 ha ka jinglut kaba kot sha ka 19.94 klur tyngka. Ba dei ha ka 31tarik Lber 2018 ba ka MGCCL ka la aiti noh ïa ka iew ha u District Horticulture Officer (DHO), Ampati u ba hangtei hi u la aiti noh sha ka GHADC ha kajuh ka sngi. Pynban la ong ba ïa ka Management Committee ki dang thaw ha ka 30tarik Nailur, 2020 kata hadien 30 bnai ba aiti ïa ka jingtei.
La ong ruyh ba katkum ka MoU, ka GHADC ka la dei ban mang ïa ki dukan da ka jingsyllok bad ka sorkar hynrei haduh ba leh ïa ka audit kata ha u Nailur 2020 ka jingaiti ïa ki dukan da ka GHADC bad ka Department kam pat sdang satia. La ong ruh ba ka tnad ruh ha ka bynta jong ka, kam shym la buh jingkylli halor ka jingbym aiti shuh ïa ki dukan.
“Kumta, ka jingpynlut kaba haduh 22.24 klur tyngka ban tei ïa katei ka iew ka la shu sahkut hajuh kumba 47 bnai khlem naduh ba pyndep khlem da pynurlong ïa ka thong kumba la mang,” ong ka kaiphod.
La kdew ruh ba ïa katei ka kam la pyntip sha ka sorkar jylla ha u Lber 2021 bad haduh mynta ki dang ap ïa ka jubab. Na ka liang ka CAG ka ai jingmut ruh ïa ka sorakr jylla ba kadei ban leh ei ei bad mang noh kham kloi ïa kitei ki dukan bad pyntreikam noh mardor.