Bengaluru, Naitung 04 : Ka kynhun ïalehkai jong ka Ri ka la ïoh ban rah ïa ka nam lahduh jong ka SAFF Championship hadien ba ka la lah ban pynliem noh ïa ka Kuwait da ka jingshut tie-breaker ha ka final kaba long hynne ka janmieet ha Sree Kanteerava Stadium ha Bengaluru.
Haba phai sha ka jingïakhun, dei ka Kuwait kaba ïoh nyngkong ban pynkhih jar tang ha ka minit kaba 14 jong ka kylla step lyngba u Shabib Al Khaldi ha ka por ba ki rangap dien ka India ki khlem poi pyrkhat satia.
Tangba katei ka kol kaba ka India ka shah lamkhmat ka la pynlong ïa ka kynhun baroh kawei ban kyndit bynriew bad kumta tang hadien 24 minit ei ei ba ka kynhun ka la ïoh ban pynïakhaid ïa ka jingïakhun lyngba ka bol kaba la thep da u Lallianzuala Chhangte ha ka minit kaba 38.
Kane ka jingïalehkai ka la bteng khlem da don shuh ba ïoh ban thep kol tad haduh ban da kut ka kylla step.
Wat hadien ba la poi ka kylla miet ruh baroh arliang kim shym la ïoh satia ban thep kol bad kumta la hap ban pynjlan biang ïa ka por ïalehkai (extra time).
Hynrei hangne ruh wat hadien 120 minit tam ka jingïalehkai hapdeng madan kawei ka kynhun kam shym la ailad ïa kawei pat ban thep kol bad kumta hadien ba la kut ka por ïalehkai la pynlong noh da ka tie-breaker.
Ha kane ka jingshut tie-breaker ruh ka la pynshong shit ïa u paidbah namar ha ka jingïashut kaba mar san ngut, ka jingïakhun ka ïakhaid hadien ba u Udanta ka India bad u Abdullah ka Kuwait ki la shut shabar ka kol. Kumta hadien ba la ailad biang, u Mahesh Singh u la ïoh ban pynkhih jar katba ïa ka bol ba shut da u kapten ka Kuwait, u Hajiah u rangap kol ka India u Gurpreet Singh Sandhu u la ïoh ban kynrup ban pyntikna ba ka India kan ïoh ban rah ïa ka nam lahduh jong ka SAFF Championship mynta ka samoi.
