Haduh 14 kol thep ki thei Mawlai ïa ka Synroplang, liem ka Maw-U-Tieng ha ka Lumparing
Ka jingïakhun la shai ka sngi (05-07) ha ka Group B pat kan long hapdeng ka Kharang SC pyrshah ïa ka Snohktilang FC ha ka por 2.30 baje janmiet bad ka Umpling SC pyrshah ïa ka Mawkriah West SC ha ka Group A ha ka por 4:15 baje janmiet.
Shillong, Naitung 04 : Ki thei ïalehkai phutbol ka Mawlai Sports Club ki la ïoh ban thep haduh 14 -0 kol ïa ka Synroplang 77, ha ka jingïakhun ha ka Group B jong ka Shillong Sports Association’s Women’s League kaba long hynne ka sngi ha Madan Third Ground, Polo. Ha ka jingïakhun kaba ar pat ka Lumparing SC kala ïoh ban pynliem ïa ka Maw-U-Tieng SC da 2-0 kol ha ka jingïakhun kaba itynnad bha ha ka Group B hi.
Baroh ar tylli ki kynhun, kata ka Mawlai bad ka Lumparing ki la ïoh ban khur ïa ka jingjop kaba mar lai sien hynrei ka kynhun kaba hakhmat ka la ïoh ban lamkhmat da ka jingïapher ha ka jingïoh thep kol kata da (+25 la +17).
Haba phai sha ka jingïakhun, ka Maw-u-Tieng ka la sdang ïa ka jingïakhun kaba ar jong katei ka lympung da ka jingkyrmen ba ka jingjop kaba ar hynrei hapdeng ka jingïalehkai bha pynban ki la mad ïa ka jingshah rem. Katei ka kynhun ka la ïakhun tyngeh tad haduh ba jan kut ka kylla step ha shwa ba ka Chibasal Sangma kan ïoh ban pynkhih jar ha ka minit kaba 35+1 hadien ba ka la ïoh ban pynkiar ïa ka bol na ka thep ai kol. Hadien kane, ka Sidaris ka la ïoh shi kol tangba ka bol ba ka thep ym shym la kheiñ satia na ka daw ba offside noh.
Ha ka kylla miet, ka jingïakhun ka la neh kumjuh hynrei ha kane ka kylla ruh ka Maw-U-tieng kam shym la ïoh thep kol satia. Ha kane ka kylla miet ruh ka Sangma ka la ïoh biang ban pynkhih jar sa shisien ha ka minit kaba 49 bad kane ka la pyntikna ïa ka Lumparing ban khur suk ïa ki lai point.
Ki nongthep kol ha ka jingïakhun kaba nyngkong pat na ka Mawlai Sports Club ki kynthup ïa ka hat-trick naka Baïarknti Mylliemngap kaba ïoh ban thep kol ha ka minit kaba 3, 18 bad 54, nangta ka Makrisha Songthiang ha ka minit kaba 34,39, 61 bad 63. Nangta ka Cynthia Mylliemumlong ha ka minit kaba 24 bad 26 bad ïa ki ar tylli kiwei pat ki kol la ïoh ban thep da ka Dakini Shylla ha ka minit kaba 35 bad ka Marbarin Nongrum ha ka minit kaba 70+2.
Ka jingïakhun la shai ka sngi ha ka Group B pat kan long hapdeng ka Kharang SC pyrshah ïa ka Snohktilang FC por 2.30 baje bad ka Umpling SC ïa ka Mawkriah West SC por 4:15 baje janmiet.