Shillong, Risaw 16: Ki Doktor ha NEIGRIHMS ki la jam sa uwei pat u mawjam jong ka jingjop ha ka liang jong ka jingsumar ïa ki nongpang bad kane ka long ha kaba ïadei bad ka jingpang cancer ne pang tumour.
Kane ka jingsumar ka long da kata kaba la tip kum ka ‘4-D Radiation Therapy’. Kane ka rukom sumar kadei kaba nyngkong eh ba la leh ha ka thaiñ shatei lammihngi. Kane ka rukom sumar ne ka advance form of radiotherapy, kadei kaba la pyntreikam tang ha ki katto katne ki jaka sumar ha ri India.
Ka kyrwoh ba la phah da u Public Relations Officer (PRO) jong kane ka Institute, la ong ba da kane ka rukom sumar la lah ban ai jingsumar ha kata ka rukom ba lada don u tumor ha u dohnud, u tor ne u dohlab, lah ban sumar beit thik tang ïa u tumor khlem da ktah ïa kiwei pat ki bynta jong ka met ne ki bynta ba shong u tumor.
U Prof. (Dr) Nalin Mehta, Director of NEIGRIHMS, u la ai khublei ïa ka kynhun ki Doktor, kiba kynthup ïa ka Dr. Mrs. Sumit Kumar, Doktor Deiwakor Chyrmang, bad kiwei kiwei de kiba ïadon bynta ha kaba pynlong ïa kane ka rukom sumar kaba jop. U la ong ba ka Radiotherapy Department jong ka NEIGRIHMS, ka la kiew sha uwei pat u mawjam ha ka jingsumar kaba kham eh ïa ki nongpang cancer, ha kaba kane ka jingpang ka pur ha ka met u briew na kawei ka jaka sha kawei pat.
Ka NEIGRIHMS ka ïathuh ruh ba ka jingsumar Radiotherapy bad Chemotherapy ha kane ka Hospital ka long ha ka dor kaba kham duna khamtam ïa kito kiba pynrung kyrteng ha ka skhim MHIS bad PM-JAY.
