Ka election ban jied ïa ki nongmihkhmat sha ka Ïingdorbar Thawaiñ ka jylla ka dang shu dep shen bad satang kumba shi snem, ki paitbah kin hap ban mih biang ban jied sa ïa ki nongmihkhmat sha ki District Council. Kumba ka long ha kane ka General Election, tang hadien jong ka sngi ñiew vote ki sengbhalang ki la pynkhih win puk ïa ka sor Shillong bad ki jaka bapher bapher ha ri Khasi, namar ba ki party riewlum kim shym la kot ka jingbun pait, kat haduh ban ïoh thaw ïa ka sorkar, kaba la pynlong ïa ki ar ngut ki MLA ka HSPDP ba kin leit ai jingkyrshan ïa ka NPP ba kan thaw sorkar.
Ka jingleit ai jingkyrshan jong kitei ki ar ngut ki MLA ïa ka NPP, ka la pynkhih win ym tang ïa ki sengbhalang, hynrei wat ïa ki paitbah nongkyrshan ruh kumjuh. Nalor kata ka jingkynnoh kaba hakhmat eh kaba mih na ki sengbhalang bad na ki nongkyrshan ki bym kwah ïa kitei ki MLA ba kin leit kyrshan ïa ka NPP, ka dei ka kyntien men die ri, rhah spah bad rhah shuki.
Haba phai ha kawei ka liang la sngew ba kitei ki jingkynnoh ki la dei lut bad ba kitei ki MLA ki la don hok ban shah kynnoh kumtei. Hynrei haba phai pat ha kawei ka liang kam sngew ïahap satia, namar ba ki don pat ki nongkitkam jong katei ka party bad ki nongkyrshan kiba la pynpaw ïa ka jingsngew pyrshah kaba jur ïa ka jingpynkhih win jong ki sengbhalang, kaba ki la pynpaw lyngba ki jingkren jong ki ha ki lad pathai khubor.
Nalor kata ka jingkren beiñ kren khoh bad ka jingtim jingtla ïa ki party riew lum ka la long palat ïa u pud ba dei ban kren. Hynrei ka jingkren jong u bah Paul Lyngdoh hadien ba la dep bam smai kum u Myntri ha ka sorkar MDA II, ha kaba u la ong ba ki paitbah ki dei ban pyrkhat hi namar ka UDP ka la pynïeng haduh sawphew hynriew ngut ki kyrtong, hynrei ki paitbah ki pynjop tang khawei ngut. Nangta ka HSPDP ka la pynïeng khatwei ngut hynrei ki paitbah ki pynjop tang ar ngut. Kumta mano ba bakla ki paitbah nongjied ne ki MLA kiba leit kyrshan ban thaw sorkar.
Kumta ki paitbah nongthep vote bad ki sengbhalang ki la dei ban pyrkhat sani halor katei ka jingkren jong u bah Paul Lyngdoh, namar jin lada ki paitbah ki la pynjop 15 na ki sawphew hynriew ngut ki kyrtong ka UDP bad san na ki khatwei ngut ki kyrtong ka HSPDP, kam don jingeh ei ei ba ki party riewlum kin ïoh ban synshar ha ka jylla.
Haba phai ha kaba ïadei bad ka election ki sengbhalang bad ki paitbah ki la dei ban pyrkhat bha, namar ha u snem ban wan ka election ban jied ïa ki nongmihkhmat sha ki District Council ka la poi. Lada ngi pyrkhat bad wad bniah bha ngin lap ba ka election sha ki District Council ki dei kiba donkam haduh katta katta bad ïa ka jingbiej bad ka jingstad jong ki paitbah nongjied, yn sa ïohi biang ha ka MDC election ha u snem ban wan.
Ha katei ka MDC election baroh ki Seng saiñ pyrthei ki don ka hok ban buh kyrtong bad lada ki paitbah kim pat sngewthuh, khlem artatien ka NPP kan jop ha baroh laiphew tylli ki District Council Constituency, namar ka dei ka party kaba ïalam ïa ka sorkar jylla bad lada kan jia long kumta ïano shuh yn kynnoh.
