Sa lai ngut pynbna kyrtong ka seng Congress ban ïakhun ïa ka elekshon ADC

Shillong, K’ Lyngkot 14: Ka seng Congress ha ka sngi baar ka la pynbna sa 3 ngut ki kyrteng jong ki kyrtong kiba la pynrung lang hapoh ka thup kyrteng kaba ar na ka bynta ka elekshon sha ka autonomous district council (ADC) ha Khasi bad ka thaiñ Jaintia Hills kaba dei ban long ha ka 21 tarik u bnai Rymphang mynta u snem.
Kine ki laingut ki kyrtong ki dei u Bah Pynbiangmi Laloo u ban ïakhun na Mowkaiaw, u Bah Brosent Siangshai na Musniang-Rangad bad u Bah Bashan Tangliang na Sumer.
Na ka liang ka seng ka la pyntip ruh ba ka jingdon jong ki kyrtong hapoh ka thup kaba ar ka la kiew sha ka 19 ngut.
Kumba ka long haduh mynta na ka liang ka seng Congress ka la dep ban pynbna haduh 45 ngut ka kyrteng jong ki kyrtong na ka bynta ka elekshon sha ki artylli ki ADC, ha kaba kumba 19 ngut ki kyrtong ki dei na JHADC bad 26 ngut ki dei na KHADC.
Shuh shuh ka seng Congress ka la thung ruh ïa u Bah Edingson Khongnohbeh kum u adhoc president jong ka Pynursla Block Congress Committee.
“Halor kane ka jingpynbna bad thung jong phi nga pynpaw ka jingkyrmen naduh ka mynsiem ba ka party kan poi sha ka thong jong ka jingjop da ki pyrshang jong phi bad ka jingtrei shitom bad ka jingnoh synniang ha kane ka kam kan kyntiew ïa ka party sha ka lawei ban wan,” ong u President ka DCC ka East Khasi Hills u Bah Neil Antonio War.
Na ka liang u Bah War u la kyrpad ruh ïa u Bah Khongnohbeh ba un aiti ïa ka thup jong ki nongkitkam sha ka ophis ka MPCC na ka bynta ban ïoh ïa ka jingmynjur bad jingpynskhem.