Ryngkat ka nguh ka dem bad duwai phirat, pyndep ki khun ki hajar ka Raid Marwet ïaka lehñiam Sohjer

Nongpoh, K’Lyngkot 19: Ki khun ki hajar ka Raid Marwet hapoh ka jingïalam jong u Syiem ka Raid Marwet, u Pa’iem Ken Syiem lem bad ki Longsan mansan, ki Lyngdoh, ki Pator ki nongïalam shnong mynta ka sngi ki la pyndep noh ïa ka kñia ka khriam bad ka jingduwai phirat haka jinglehñiam Sohjer kaba la pynlong ha Baridua, Ri Bhoi District ban ainguh aidem ïa u Blei Nongbuh nongthaw ba un theh ki jingkyrkhu baroh shisnem hadien ba ki khun ki hajar kila dep ban kheit ïa u soh nyngkong jong ka jingtrei shitom.
Hakane ka sngi la pyndep ïaka jing kñia ha ryngkat ka shuid ka shor kaba la pyndep kat kum ka jing hikai u men barim ban pyneh ïala ka riti ka dustur bad ka kolshor bala shim bynta da u Syiem ka Raid Marwet ryngkat ki nongmihkhmat naka Hima Mylliem kiba la ai ïaka nguh ka dem ïa u trai nongbuh nong thaw u ba la ri sumar bad u ba la ai ka jing sei soh haka khyndew ka raid bad ki ba la buh da ka jing duwai naka bynta ka ka jing sei soh bad ka bha ka miat jong u khun u hajar ka raid naka bynta une u snem baroh shisnem.
Hadien ba la dep kñia daka kaba suid ba shor ryngkat u jhur kpu la bud pat sa ka jingïa dih ïa ka ka ïad um kum ka dak ka jingainguh ïa u nongbuh nong thaw bad ki longshuwa manshuwa.
Naka liang u Paiem Ken Syiem haba kren ha katei ka sngi u la ong ba katei ka jinglehñiam ka dei kaba long kyrpang haka Raid Marwet ryngkat ka jinglehkmen ka shad ka rwai bad ka risa hadien ba u Blei u la kyrkhu kyrdoh ïaki baroh shisnem kaba dei ruh shibynta ban pynneh ïaka riti ka dustur ka kolshor tynrai ba kim dei ban duh ban dam noh hynrei ba kin neh pateng la pateng.
U la buh ruh ka jingkyrpad sha ka sorkar ba kan phai khmat lem sha kum kitei ki jait lehñiam ban noh ki jingïarap khnang ba kum ka Raid hi baroh kawei kan dang lah ban pynbha bad pynjanai shuh shuh ïa katei ka jinglehñiam na uwei u snem sha uwei pat.