Ka jingpyntrei ïa ka surok na Shillong sha Dawki la dei ban kham pynstet khnang baka jingkhnium bad ka jingjynjar jong ki paidbah nongleit jongwan naduh ka por 8:00 baje mynstep kiba ju leit ban buh skul ïa ki khun nangta kiba leit trei sha ophis treikam bapher bapher bad ruh ïa kito kiba beh ïa ka bylla ka sngi kin poi ha ka por kaba biang. Katno ka long kaba isynei haba ïohi ïa ki khynnah kiba riam skul ba kin sahkut palat shi kynta ha lynti ban poi sha skul. Kaba kham i sangsot ka long ba na kane ka daw ka jingjur palat ka blok don ki kmie ki kpa kiba la mih lypa ar kynta ne shi kynta shiteng shwa ka por.
Dang shen ha ka jingleit jurip da ki nongïalam jong ka Synjuk ki Nongsynshar Shnong ka Upper Shillong ryngkat lang ki heh na ka National Highway Infrastructure Development Corporation Limited (NHIDCL) kynthup lang ki heh sorkar nalor ki heh pulit ki la lap ba ka jingdheng kali kaba sdang naduh ki bynta jong ka Laimer ter ter haduh Umshyrpi kadei ka dawbah kaba ktah pat ïa ka dheng kali ha ka nongbah baroh kawei. Ka daw tynrai hi ka long ba ki la don bun bha ki lad bad ki shnong kiba don sharum jong ka jingkieng Umshyrpi. Lada khein lei lei kane ka surok kadei u thied bah ban poi sha West Khasi Hills, South West Khasi Hills, Eastern West Khasi Hills bad ruh ïa ki bynta ba shathie jong ka East Khasi Hills kum ki bynta jong ka Pynursla, Shella bad Sohra.
Tang ha ka shisngi sngi ka jingtuid ki kali sha nongbah Shillong ka dei beit da ki hajar ne ki phew hajar tang lyngba ka lynti Upper Shillong. Kumta, lada jia ba ka don ka dheng kali ha ki bynta jong ka Upper Shillong khlem pep ka jingshah ktah kan long beit ïa baroh ki kali kiba wan na baroh kitei ki jaka bad kumta kane kan ktah kylla pat ïa ka leit ka wan sha ka surokbah lyngba ka Mawlai, sha Khyndailad, Barik ter ter shaduh Laitumkhrah bad shaduh ki bynta ba shaneng.
Ban weng ïa kane ka jingeh mynta kadei beit tang ban pyndep kham kloi noh ïa ka surok fourlane naduh Umshyrpi bad la tikna ba tang shu dep ïa kane kan ym don shuh ka jingdheng kali bad ka leit ka wan jong ki paidbah ruh ka la kham suk. Hynrei, lada kren pat shaphang ka surok ban poi sha ki thain Pynursla bad Dawki ka jingshna ïa kane ka surok la i dei ban ong ba wat lada hap ban pynstet hynrei donkam pat ban peit bha ba kan ym buh jingma. Ki nongtrei ïa kane ka surok ki dei ruh ban long kiba phikir bad peitngor namar jan man ka por ki bor sorkar ki pynbna ba ki nongleit nongwan ki dei ban husiar haba ki ïaid na kitei ki surok.
Khatduh hi, kaba kham kongsan ka long ba ka NHIDCL kan pynstet katba lah ia ka kam khnang ba ka jingshah ktah ki paidbah na ka dheng kali kan ym jia shuh kumba jia mynta ha kaba ki paidbah ki hap ban ap da ki bun bun kynta tang na Upper Shillong ban poi sha Iew kynthup ïa kito kiba leit buh skul bad kiba leit trei bad leit bylla. Ka bynta kaba ka Synjuk ka kdew ka long ba ki i sangsot bad i synei bha ïa ki kali shimet kiba kit nongpang kiba ngat ha kane ka dheng kali da ki kynta. Ki ong ruh ba lada dei ki ambulance ki kham suk ban ïaid namar ki don siren. Kumta sngew ïahap ban kyrshan lang ïa ka jingkyrpad jong ki ba donkam ba ka NHIDCL ba kan pynstet khnang ba ka jingmyntoi kan dei salonsar ïa baroh khlem da thew ïano ïano ruh.
