Khliehriat, Nohprah 17: Ka jingïalehkai phutbol ba la tip kum ka 2nd RYC Bataw Knockout Football Tournament 2023-24 kaba la long hynnin ka sngi saitjaiñ ha madan Lacheh Playground Bataw bala pynïaid da ka Rumshnong Youth Club Bataw.
Ka jingïakhun hapdeng ka Umlyngsha YSSC pyrshah ïaka Wamaia FC kala long kaba itynnad ha kaba ym shym la don ba ïoh ban pynkhih jar tad haduh ba la poi da ka jingïashut Tie Breaker, ha kaba ka Umlyngsha YSSC kala jop pyrshah ïa ka Wamaia FC da 4:2 bad lyngba kane ka kabu ka Umlyngsha YSSC ka la ïoh ban rung syndon sha ka Semi Final. Haka jingïalehkai ba ar hapdeng ka War United FC pyrshah ïa ka Kynshewlang FC ki nongkyrshan na baroh ar tylli ki team kila khmih lynti ba ka team jong ki kan ïoh jingjop namar ka jingïalehkai ka long kaba ïadei bor bha bad ha kaba kut ka jingïalehkai ka War United FC ka la jop pyrshah ïa ka Kynshewlang FC da 2:1.
La pyntip da u Sports Secretary ba ka jingïalehkai Semi Final kan long hapdeng ka Umlyngsha YSSC pyrshah ïa ka War United FC kaba long haka 22/12/2023 ha ka por 12 baje mynsngi.
Ha kane ka sngi la ïoh ruh ban pyllait paidbah ïa ki Lucky Draw jong ka Club da u ma Martin Lyngdoh Assistant Waheh Shnong Bataw ryngkat u President Bah Deihok Sumer bad General Secretary Ma Ampli Rupsi bad u Ma Bohtein Biam Secretary Lucky Draw na ka liang ka Club.
