Rung semi final ka MLP Sohra, PHE Sohra Division, Combine SHG Sohra & Ribhoi Office Combine

SOHRA, Lber 26: Ka Combine SHG bad ka PHE Sohra Division ki la jop ïala ki jong ki jong ki jingïakhun ha ka Inter Office Cum Corporate League T20 Cricket Tournament 2025, ba la pynlong da ka East Khasi Hills Cricket Association [EKHCA], ha Sohra, hynne ka sngi Balang.
Baroh ar tylli ki kynnhun ki la khur ïa ka jingjop haba wan ban tied ba ar, na ka liang jong ka Combine SHG ka la pynliem suk da 8 wiket ïa ka SSA Shella Bholaganj ha ka jingïalehkai kaba nyngkong, katba ka PHE Sohra Division ka la pynliem da 3 wiket ïa ka Exporter XI.
Ha kaba nyngkong, ka SSA Shella Bhologanj ka la jop ïa ka toss bad jied ban tied nyngkong, hynrei ka la shah pynkut noh da tang 63/10 haki 16.1 ober, dei tang u Ritchie Diengdoh uba la kham paw ha ka tied da kaba kamai 17 ron naki 23 bol. U Sunny Sten u la khur 4/10 haki 4 ober.
Ka Combine SHG ka la pyndep ban kamai 66 ron ba ka donkam da kaba hap tang 2 wiket haki 10.1 ober. U Banphira Basaiamoit u la lamkhmat ha ka tied da kaba kamai 28 ron naki 31 bol. ïa ka nam Player of The Match la khur da u Sunny Sten.
Ha ka jingïalehkai kaba bud, ka Exporter XI ka la buh ïa ka thong da 169/10 haki 20 ober, u Shubro Sarkar u la long uba kongsan ha ka tied da kaba kamai 72 ron naki 39 bol. Katba u Marken B Kharkongor u la long uba seisoh tam ha ka bowling da kaba khur 5/31 naki 4 ober.
Haba jubab ïa ka thong, ka spah ron na u Sandy Kharshandi, uba la kamai 106 ron (56 bol) ka la ai mynsiem ïa ka PHE Sohra Division ba kan lah ban kynjoh 170/7 haki 20 ober bad ban jop ïa ka jingïalehkai da 3 wiket. Ka jinglah jong u ban lehkai bha ha ka tied ka la pynlong ruh ïa u ban khur ïa ka nam Player of The Match.
Ka jingbatai ba lyngkot jong ar tylli ki jingïalehkai ba la long ha ka sngi Ba Ar (25 tarik, 2025) jong ka Inter Office Cum Corporate League T20 Cricket Tournament 2025. Ka MLP Sohra (kamai 218/3 haki 20 ober) ka la pynliem da 69 ron ïa ka Exporter XI (kamai 149/6 haki 20 ober). ïa ka nam Player of The Match la khur da u Johnward Marak [kamai 50 ron (30 bol) & khur 1/20 naki 4 ober].
Ka jingïalehkai kaba bud, ka Ribhoi Office Combine (kamai 39/0 haki 2 ober) ka la jop suk da 10 wiket ïa ka Sohra Labour Union (37/10 haki 13.5 ober). Player of The Match la khur da u Ganesh Sahani.
Katkum ka jingïoh khur point, kiba la ïohrung sha ka wat ïakhun ki long ka MLP Sohra, ka PHE Sohra Division na ka Group-A, nangta ka Combine SHG Sohra bad ka Ribhoi Office Combine na ka Group-B.
Ki bor pynïaid jong kane ka lympung ki la pynkhreh ban pynlong ïa ka semi final ha ka 28 tarik (sngi thohdieng) mynta u Lber, 2025. Ha ka por 9 baje, ka MLP Sohra kan aireng pyrshah ïa ka Combine SHG, Sohra, nangta ha ka por 12 shiteng mynsngi ka Ribhoi Office Combine kan aireng ïa ka PHE Sohra Division.