Nongstoiñ, K’lyngkot 29: Ha ka sngi palei u bah K.P Pangñiang president rangbah ka Hill State People Democratic Party u ba dei ruh u kyrtong jong ka 32 Rambrai Jyrngam Constituency, u la hiar sha ka shnong Mawlieh ban pynlong ïa ka jingïalang ban pdiang burom ïa ki riew rangbah ki longkmie bad ki samla kiba la wan na kiwei pat ki party kum na ka NPP, Congress bad kiwei kiwei ban pynïasoh sha ka party, ban shimti ruh kum ki nongkitkam bad ki nongïalam jong ka HSPDP Mawlieh zone.
Ha katei ka sngi la ïadon lang da u bah R.Nongsiej uwei na ki nongïalam jong ka Rambrai zone, ki rangbah bad ki longkmie. Ha katei ka sngi naduh ki longkmie kiba bah la ki khunlung ha ka met, ki la ïa tuid sha katei ka jingïalang bad ym tang ba ki shu leit ban sngap ïa ka jingpynshai jong u bah Pangñiang, hynrei ki la ïatur shakhmat ban pynrung kyrteng bad ban pynïasoh kum ki nongkyrshan ba pura.
U Bah Pangñiang u la ong ba ka jinglum jong u ha katei ka sngi, ka long tang ïa ki nongkitkam bad ki dkhot na ki polling station kiba hap ha ka Mawlieh zone kum ka Shitangbah, Domsohksoiñ, Maw-phansin bad Mawlieh, namar ba ki don ruh shibun kiba dang wan pynïasoh sha ka party bad kiba la kloi ban shimti kum ki nongkitkam, na ka bynta ban pynkhlaiñ ïa ka party ha shuwa ban poi ka sngi thep vote.
Nalor kat u la ong ruh ba ka shnong Mawlieh ka dei ka shnong trai jong u kpa jong u ha kaba ki kha ki man baroh ki don ha katei ka shnong. Kumta shuwa ba un mih madan sha kiwei pat ki jaka ban pan ïa jingkyrkhu kyrdon na ki kha ki man, namar ha ka jingngeit jong ka jaitbynriew Khasi ka long ba ka jingkyrkhu jong ki kha ki man ka dei kab donkam haduh katta katta.
U la pyrshang ban pynsngewthuh ïa ki paitbah ba ka jingshah rem bad ka jingkyntait jong ki paitbah ha ka election ba la dep, ka lah ban dei ba ha ka jinglong nongmihkhmat jong u ki don ki jingduna, ki jingbakla kiba long ki maw jynthut ïa ki paitbah. Hynrei ha kane ka kynti u da kyrpad ba lada ki don kiba kum kita, kin ïaklet noh bad kin ïa kylla kaba mut na ka bynta ka jingmyntoi ha ka imlang sahlang bad ka roi ka par.
