Khliehriat, Nailur 29: Ka Sutnga Mission SSCC ryngkat bad Musniang SC ki long ki ar kynhun kiba la jam shaduh ka wat ïakhun ba khadduh (final) ha ka lympung ïalehkai phutbol kyrdan Second Division jong ka East Jaiñtia Hills District Football Association, bad kane la pynthikna hadien ba ki la khur jingjop ha ka semi final kaba la long ha ka Sngi Saitjaiñ (28 tarik, Nailur, 2024) ha madan Artificial Turf, Diengshynrum, Khliehriat.
Haba phai sha ka jingïakhun Semi Final kaba nyngkong ha katei ka sngi, la sakhi ïa ka Sutnga Mission SSCC kaba la pynliem noh da 3-0 kol ïa ka Ladrymbai Dongwah SC. Kine ki lai kol na ka Sutnga Mission SSCC la thep da u Wellson Pala haka minit ba 8 jong ka kylla step, bud sa ar kol ha ka kylla miet na u Lebor Bamon (49 minit) bad khadduh na u Moses Swer (senior player) ha ka 66 minit.
Katba ha ka jingïakhun Semi Final kaba ar, ka kynhun ïalehkai jong ka Musniang SC kala lah ban pynliem noh da 2-0 ïa ka R.Madanpynriang SC. Ka Musniang SC ka la pynkhihjar nyngkong lyngba u Nikerda Dkhar tang hadien 3 minit ba la ïaid ka kylla step, nangta ka kol kaba ar na u Heimonmiki Dkhar haka minit ba 73.
Lyngba kane ka jingjop ka kynhun ïalehkai jong ka Sutnga Mission SSCC bad ka Musniang SC kin aireng pat ha ka final ban ïaknieh lahduh ha ka 2nd Division 2024.
