SHILLONG, Nailur 29: Ha ka step jong ka sngi shuwa ka World Tourism Day, la pynlong ïa ka jingïakop mareh Run for Tourism ha ka step Sngi Thohdieng kum shi bynta ban rakhe ïa ka World Tourism Day ha nongbah Shillong na Dhakheti.
Ïa kane ka jingïalehkai la pynlong da ka Real Sports India ( kaba la tip ruh kum ka Sportive) ba la kyrshan da ka IndiatourismShillong, bad ruh na ka tnat jngohkai pyrthei jong ka sorkar jylla Meghalaya.
La sdang kaweh ïa ka lama ïa ka jingmareh naduh ka por 6 baje mynstep da u Amit Gupta, Assistant Director ka India TourismShillong.
Ki la don haduh 149 ngut ki nongmareh kynthei bad shynrang kiba la wan ïashimbynta.
Kine ki long ki kyrteng jong ki nongmareh kiba la khur jingjop, na ka liang ki shynrang, la wan ba nyngkong da u Wankyrme, bud sa u Donkupar (2nd), Pinku Nath 3rd.
Shynrang kiba la 50 snem tam, ki ba jop ki long u Ramesh. Ha ka Junior (11 snem) la jop da u Devin.
Katba ha ka kyrdan ïakop mareh ki kynthei, kaba la jop kyrdan ba nyngkong dei ka Uair, nangta bud sa ka Mary Queen, bad ka Angelista.
Kynthei kiba la 50 snem tam la jop da ka Eldalyne.
Kane ka jingïakop mareh ka long shi bynta ban kyntiew ïa ka kam jngohkai pyrthei sha kane ka thaiñ.
