Rung final ar tylli ki kynhun na East Khasi & East Jaintia, kawei na Ri Bhoi & West Jaintia

Shillong, Naitung 26: Ka jingïaknieh ban ïoh mihkhmat ïa ka jylla ha rynsan ïalehkai Inter National Level jong ka Subroto Mukherjee Cup ka la jam mynta sha ka semi-final , ha kaba ki la don ar tylli ki kynhun napoh East Khasi Hills bad East Jaintia Hills, kawei na Ri Bhoi bad West Jaintia Hills kiba la ïohrung shaduh ka wat kaba khadduh jong ka State Level Subroto Mukherjee Cup Football Tournament 2023 kaba la pynïaid da ka Directorate of Sports & Youth Affairs.
ïa ka jingpynïakhun ïa ka final ba baroh lai kyrdan, kata ka Under-14 jong ki shynrang, Under-17 jong ki kynthei bad Shynrang, la pynkhreh ban pyndep mynta ka sngi, ka 28 tarik u Naitung, bad ka madan kan long ha madan phutbol SAI, NEHU.
Ha ka kyrdan ïakhun jong ki Under-14 Boys, ki kynhun ba la ïoh ban jam shaduh ka wat kaba khadduh ki kynthup ïa ka K.B. Memorial Secondary School (East Jaintia Hills) bad ka H.K. Sing Secondary School (West Jaintia Hills) ha kaba kine ki ar kynhun kin sa hap ban ïakhun mynta ka sngi ha ka por 11 baje mynsngi.
Na ka liang jong ka K.B. Memorial Secondary School ka la ïoh ban rung sha ka final dei hadien ba ka la jop da 2 kol pyrshah ïa ka Mari Apal, UPS, Mangsang (East Garo Hills), bad ïa kine ki ar kol la ïoh ban thep da u Ebiangmi Siangshai ha ka minit kaba 17, katba ka kol kaba ar la kum thep hi da u Griksrang Marak .
Ka H.K. Sing Secondary School pat ka la pynliem ïa ka Myngken Higher Secondary School (Ri-Bhoi) da 3-2 kol ban ïohrung sha ka final. Ha kane ka jingïalehkai, na ka bynta ka Ri-Bhoi ki kol la thep da u Me-uba-ai Sumer bad u Chanjib Chettri, katba na ka bynta ka kynhun kaba khur namjop la thep da u Budmi ha-oo Mukhim u ba la thep ar kol (3, 60 min) bad na u Kynsai-I-manmi War.
Haba phai pat sha ka kyrdan ïalehkai jong ki samla lud ba dang hapoh 17 snem rta jong ki shynrang, ka Assam Rifle Public School (East Khasi Hills) kan sa hap ban aireng pyrshah ïa ka Rymbai Presbyterian Hig. Sec. School (East Jaintia Hills) ha ka final hadien ba baroh ar kynhun ki la jop ha ki jingïakhun semi final ka jong ki hynne ka Sngi Palei.
Na ka liang jong ki khynnah lehkai jong ka skul Assam Rifle Public School ki la lah ban pynkhyllem noh ïa ka Sibsing Memorial Govt. Hig. Sec. School (West Khasi Hills) lyngba ka jingïashut ïa ka tir breaker hadien ba ki la ïakhaid mar 1 kol. ïa ki kol ha ka por ba dang ïakhun la thep da u Rosangzela na ka bynta ka Assam Rifle katba u Rishandabok Marwein u la ïoh ban pynïakhaid na ka bynta ka Sibsing Memorial, hynrei phewse ka la shahrem noh ha ka tie breaker da 3-2.
Katba na ka liang jong ka Rymbai Presbyterian Hig. Sec. School ka la pynliem noh ïa ka Okkapara Secondary School (South West Garo Hills) da 2 kol. ïa kine ki kol la ïoh ban thep da u Bankerbha Dkhar bad u Besterly ksih.
Ha ka kyrdan ïalehkai jong ki kynthei Under-17, ka Sibsingh Memorial Govt. Sec. School (West Khasi Hills) ka la shah pynkhyllem noh lyngba ka tie breaker ha ka Saiden Secondary School (Ri-Bhoi). Ha ka jingïakhun baroh ar kynhun ki la ïoh ban thep mar 1 kol, na ka bynta ka Ri-Bhoi ka Younisha Thabah ka la ïoh ban thep ïa ka kol tang mar ïasdang ka minit ïakhun, kata ha ka 5 minit ba la ïaid ka kylla step hynrei la shah pynïakhaid noh lyngba ka kol na ka Daphishisha Syngkli shuwa ban sa kut ka por, kata ha ka 60+3 minit ba la pynjlan ïa ka minit shuwa ban pynwai, bad kane ka kol ka la ai mynsiem ïa ka kynhun bad btin lynti ruh ban jop da 2-4 ha ka jingïashut ïa ka penalty.
Katba na ka liang jong ka Iewrynghep Secondary School (EAST KHASI HILLS) ka donkam satang shi sien ka namjop ban ïoh mihkhmat biang sa shi sien ïa ka jylla hadien ba ka la pynliem ïa ka North Liberty Hig. Sec. School (WEST JAINTIA HILLS) ha ka semi final.
Kane ka jingïalehkai ka la jam sha kaba kut ha kaba ka Iewrynghep Secondary School ka la jop da 4-2 kol ïa ka North Liberty Hig. Sec. School. ïa ki kol na ka bynta ka Iewrynghep la thep da ka Larihun Songthiang (4, 21 min), nangta ka Melaribha Lyngdoh (25min) bad na i Sodawanki Suchiang, katba na ka bynta ka North Liberty la thep da i Deigracia Dan bad i Beatify Shylla.
Ka rai na ka bynta ki lai kynhun na baroh lai kyrdan ban mihkhmat ïa ka jylla ha lympung lehkai Inter National level la pynkhren mynta ka sngi ha SAI Ground, NEHU, ha kaba ka jingpynïakhun ïa ka final kan sdang naduh ka por 9 baje mynstep, bad ka jingïalehkai kaba nyngkong kan long shuwa jong ki kynthei Under-17, hadien nangta bud sa ka jingïakhun namlahduh jong ka kyrdan Under-14 jong ki khynnah shynrang bad ka jingïalehkai kaba khadduh kan dei ka Under-17 shynrang.