Ka jylla nalor ba ka la paw kum ka jaka ba kynrei bad die pathar bha ïa ka kyaid hynrei mynta ka la kylla long ruh kum kawei na ki kad bah ba ki nongkhaii drok ki sdang ban ïoh die ïa utei u jingdih uba la pynngop ïa bun ki khun samla ha kaba bun na ki, ki dei kiba dang khie samla. Kane ka jinglong jingman ka buh ruh mynta ïa ki samla ha ka jingma bad ka jingsyier kaba khraw bad kane ka poi ruh haduh ka khep ba ki hap ban long kiba peitngor ym tang ïoh kin ngat ïalade hynrei ban shimkhia lang ruh ba ïoh ki para bad ki bahaïing ha sem kin ngat lang ha katei ka apot kaba ka pyrthei ruh ka dumbuit bad kutlad ban ïakhun pyrshah.
Ka jingïai bteng ban ïoh kem ïa ki nongkhaii drok jan man ka sngi ha kylleng ki bynta jong ka nongbah Shillong ka pyni ruh ïa u dak jingkylli uba heh bha ba kumno kine ki briew ki shlur haduh katne katne ban leh ïa kitei ki kam kiba long pyrshah ïa ka imlang sahlang bad ïa ka lawei jong ki khun samla. Lada jia ba ki pulit kim peitngor ym tip shuh kaei kaban jia ïa kane ka jylla Meghalaya. Katei ka jingïoh kem man ka por ïa ki nongkhaii drok ka pyni shai ruh ba ki Samla ka Jylla kila ngop bha ha une u jingdih ba sniew, ïa kaba ka imlang sahlang bad ki Longïing longsem kin hap ban peitngor bha ïoh ba ki ngat ïa ki jingeh bad ki jingjylla hala ka jong ka mat khohsiew.
Kine ki jingïohkem ki pynpaw ba na ka bynta ban lah rat dyngkhong ïa kiwei pat ki samla ba la ngop ha u drok, ka shong eh ha ka jingtrei shitom ki para khun samla, ban btin bad ban ïalam lynti ïa ki samla kiba la ngat ban kiar rai maw rai dieng na u drok ne kynja, uba da shisha uba lah ban wanrah shuh shuh ki har rukom ki kam pynklumar ïa ka ïing ka sem, ïaka imlang ka sahlang bad ïa ka shnong ka thaw hi baroh kawei.
Ka jingkylli kaba mih sa nangno pat ïoh ban wan paw pyrthei u drok ha kane ka jylla, kaba la die pathar bha ïa ka kyiad ka um phareng, hato don mo kita ki kynja bor na sha lyndet, kiba thmu shisha ban nang pyntroiñ shuh shuh ïa ki khun samla ïa ka met ka jong ki. Ka jubab ban ïoh ka long kaba eh bad ba jwat bha, namar ba na ka liang ki bor pulit, ki shem jingeh bha ban tem, kampher ba na ka por sha ka por kila bteng ba kin ïa trei shitom, ban kem ïa ki briew kiba wan ban khaii beaiñ ïa u drok ha kane ka jylla.
Kumta lada ka sorkar ka sngew don ïa ka mynsiem ba sngewkhia ïala ki khun samla, imat ka por ka la donkam ïaka ba kan thaw shuh shuh ïa ki aiñ ki kanun kiba tyngeh ban set phatok ïa ki nong khaii beaiñ ïa u drok ne kynja ha kane ka jylla kumba long kiwei ki Ri ka pyrthei. Nalor katta, ka por ka la donkam wat ïa ki Seng samla bad la ki Dorbar Shnong ban sdang ban buddien ïa ka jinglong ka jingman ki khun samla ha la ki shong ki thaw, ha kaba tang shu ïohi ïa ki dur khmat kiba kham ipher, donkam mardor ban khot bad ban sdang ban ïa syllok janai bha bad ki samla ha shwa ba kin shah shong kulai ka jingim dih drok.
Lada shu ïakren ïa kane ka mat ba ïoh pyndon kam laitluid ki khun samla ïa u drok, ka daw hi ka long ba man la ki khun samla, ka pisa ki don beit ha ka met, kaba ïa kane ka pisa, kham bunsien ka dei kaba ki ïoh na la ki kmie ki kpa, kiba da katta ka mynsiem sngew ïeit thep mynsiem palat ïala ki khun kynthei bad shynrang, khlem da kylli khlem da pyrthew, ai beit ïa ki khun katba ki pan ïa ka pisa. Kane ka dei ka jingeh, namar haba don ka pisa bad haba la shah pynngop ha la ki lok, suki pa suki sdang ban kyrni bad haba ym lah ban ïoh shuh tang nala ïing, sdang keiñ sa ka tuh klep na ka pla jong ka kmie u kpa, ne ba hateng hateng haba kham sngew jynjar ban ïoh na la ïing, sdang pat sa ka tuh klep ia kitiar ki tar ba rem dor na ki briew.
Lada shu ïakren u drok, kynja ne ka kyiad, ki long ki jingdih, kiba uwei ba u briew u ngop kham niar ba kin lah ban lait na u, toi ïa ka kyiad dang don ki lad ki lynti kaba pynlong ïa u briew ba un lah ban kiar katno tam lei lei haba la sdang ban ban ka jingshitom haka met, pynban ïa u drok ne kynja, ka jingeh ha u briew uba la kyrni ka long lada um lah ban ïoh, tang katta u king hi ngit ka khlieh, u par niangkhriat ka met, um nang ban thiah um nang shuh ban dem. Hynrei kaba kham ma palat ïa ki samla ba la kyrni ha u drok ka long haba ki la dih buiad ïa u, kaba nyngkong eh kaba ktah ïa ki dei ka bor pyrkhat, ha kaba kim tip briew shuh syndon ïalade, hangne keiñ ki sdang pat ba kin leh ïa ki jait kam kiba sngew ngiew ban ïohsngew ïa ka khana ban sngap.
Kumta, ban khanglad ïa u drok kam shong eh tang ha ki kti jong ki pulit hynrei kumba la mih paw ka nuksa na ki khubor bala mih paw, donkam shisha ban ïoh ïa ka jingïatreilang bad ki Samla jong man la ki shnong ki thaw, nalor katta, ki samla pule kin hap ruh ban long kiba im ka jingim kaba adkar, ha kaba kin hap ban khmih thuh bha ïala ki paralok ba ki juh ïalang, katno tam lei lei haba ki sdang ban shem bad ïohi ïa ki dak ki shin bym i tikna mardor donkam ban ïarap lem ban pyntip sha ka ïing ka sem, ne ban ïaleh kloi lan ban tam lem ïa ki ban ïa syllok, namar para samla haba don ka mynsiem ïa ïeit bad ba ïajan, lah ruh ban pyllait ïa ki na u kynjri ban shah teh long mraw junom ha u drok.
